Siumup siuttui Aleqa pillugu ataatsimiilersut
NUTARTIGAQ: Nalunaaqutaq marlup qeqqa ataatsimiinneq aallartittoq oqaatigineqarpoq.
Pisoq Aleqa Hammondimut qanoq kinguneqassanersoq qularnarpoq. Taamaattorli soqutiginnittut tamarmik ullumi marlunngornermi paasisaqarsinnaassasut, Siumup allattoqarfianit oqariartuutigineqarpoq.
- Siumup siulersuisuuneri ullumi ataatsimiinnissaat naatsorsuutigaarput. Ataatsimiinnissaq ualeru unnuguluunniit pissanersoq oqaatigisinnaanngilara, ilaasortammi suliffii piffissaallu apeqqutaammata, Siumumi allatsi Mikael Petersen KNR-imut oqarpoq.
Partiip siulittaasuata Kim Kielsenip pisoq ippassaq ataasinngornermi oqaaseqarfigaa. Siumumi ulluinnarni aqutsisut ataatsimeereerneranni tamanna pivoq.
- Folketingimi ilaasortap Aleqa Hammondip Folketingimi kreditkortini atorlugu imminut aningaasanik atuinera akuersaarneqarsinnaanngitsoq, tamannalu pillugu paasissutissat ersarinnerusut pissarsiarineqareerpata Siumup siulersuunerinit suliaq ingerlateqqinneqarumaartoq, Kim Kielsen allappoq.
Partiip inuusuttaasa pisoq aamma akuersaarnagu oqariartuutigaat. Taakku Siumup siulersuisuunerini marlunnik ilaasortaatitaqarput.
- Tusagassiutitigut tusarparput Folketingemi Siumut sinnerlungu ilaasortaq
aningaasanik atornerluisimasoq.
- Nuna tamakkerlugu Siumup Inuusuttaani siulittaasutut, ilaasortarpassuangut nunarput tamakkerlungu sinnerlungit erseqqissaassutingissuara inuusuttut akuerinngikkipput aningaasanik atornerluisimaneq, SIS-imi siulittaasoq Steve Olsvig Sandgreen tusagassiuutinut allappoq.
D: Anisitaassagaluarpoq
Aleqa Hammondip nammineq atugassaminik pisortat aningaasaataanik siullermeerluni atuinngilaq. Parteeqataasalumi isumakkeerfigereerpaat. Naalakkersuisooqataasunili assingusumik pisoqarsimagaluarpat isumakkeerinnittoqarsimanavianngikkaluartoq Demokraatit siulittaasuat oqarpoq.
- Pisortat aningaasaataannik atornerluineq akuersaanngilluinnarparput. Uangalu partiinni atornerluisoqarsimagaluarpat taamaaliortoq partiimit anisitaasimassagaluarpoq. Taamaattorli Kim Kielsenip Siumullu siulersuisuunerisa qisuariarnissaat oqaaseqarfigissanngilara, Siumumimi siulittaasuunngilanga, Randi Vestergaard Evaldsen Sermitsiaq.ag-imut oqarpoq.
Aamma atuaruk Kreditkortimik atuineq pillugu allaaserisat tamaasa
