Siumup qinigassanngortitaata Demokraatit appisaluuppai
Demokraatit partiini kisiartaallutik piffissaagallartillugu qineqqusaarutissaminnik katersisimapput. Taamaammat Siumup avinngarusimasuni qinigassanngortitaasa pingasut Demokraatit demokratiimik naapertuinerlunnerarpaat. Taakkua isumaqaramik, tapiissuteqartoqanngippat kommunenut qinigassanngortittut nunaqarfinnukarnissaminnut akornuserneqarnerisigut demokratiimik naapertuiniarneq innarlerneqassasoq.
-Qineqqusaartut nunaqarfinnukartartut illoqarfeeqqanullu angallannikkut attaveqarfiluttunut orniguttartut ikittuararsooreerput. Taamaammat kommunenut qineqqusaarnernut tapiisarnerup atuuttup unitsinneqarnissaa Demokraatit qinermassuk uggornaqaaq, Siumut sinnerlugu qinigassanngortittoq Tasiilami najugalik, Andersine Hansen-Kristiansen oqarpoq.
Nunaqarfiit ilaasa qineqqusaartunit tikinneqartarnerat akuttoqaaq, ilaallumi tikinneqanngivissallutik. Soorlu Avanersuarmi, Siumut sinnerlugu Mads-Ole Kristiansenip qinigassanngortiffiani pissutsit taamaattut. Taassumali partiip pingaarnersiuinera paasisinnaanerarpaa.
- Soorunami partiit Inatisartunut qineqqusaarneq pingaartinneruaat, kommunelli kattussuunnerisa kingorna aatsaat kommunerujussuarnut qineqqusaartoqassaaq. Kommunetoqqanit qinigaasoqarnissaa qulakkeersinnaanngilarput. Taamaammat qineqqusaartut sumiiffinnut tamanut aqqusaartarnissaat pisariaqarpoq, Mads-Ole Kristiansen oqarpoq, nangillunilu – Demokraatilli tamanna soqutiginavianngilaat – maanimi qinerneqarnaviannginnamik.