Siumup misissuisarfiup nalliuttuni matoqqanissaa kamaatigigaa: Matu qiversivillugu ammarneqarpoq
Naqqiissut: Ilanngutassiaq misissuisarfiup juullikkut ukiortaallu akornanni ulluinnarni ammanissaanik paasissutissartalerlugu nutarterneqarpoq. Siullermik juullikkunni matoqqassasoq allassimagaluarpoq. KNR-ip kukkuneq ajuusaarutigaa.
Ernumanarlunilu akuersaarneqarsinnaanngilaq.
Siumup siulittaasuata tullia, Vivian Motzfeldt Nuummi misissuisarfiup juullikkunni matoqqanissaa pillugu oqarpoq.
Misissuisarfik decembarip ulluisa 24-ani 25-ani aamma 31-ani kiisalu januaarip aallaqqaataani matoqqassaaq, taannali decembarip 26-ani – akunnerni marlunni ammasussaavoq.
Suliaq naatsumik
Nuummi misissuisarfik decembarip 24-ani, decembarip 25-ani, decembarip 31-ani kiisalu januaarip aallaqqaataani matoqqassaaq.
Misissuisarfik decembarip 26-ani akunnerni marlunni qulinit ullup-qeqqanut ammassaaq.
Angalasussat tamakkiisumik akiuussuserneqanngitsut tunillatsissimannginnerminnik nalinginnaasumik takutitseqqaartussaapput.
Misissuisarfiulli matoqqanissaa pissutigalugu angalasussat tunillatsissimannginnerminnik januaarip ulluisa pingajuat ilanngullugu takutitseqqaartariaqanngillat.
Tamanna ajornartorsiutaasoq, Siumut naliliivoq. Tunillatsissimasummi amerlangaatsiarput. Taamaammat Air Greenlandip timmisartuinut ilaaniartut tamarmik tamakkiisumik akiuussuserneqarsimanngikkunik coronamik tunillatsissimannginnermik sivisunerpaamik akunnernik 48-nik pisoqaassusilimmik takutitsinisarnissaat aalajangernikuuaat.
Tunillatsissimannginnermullu uppernarsaammik pissarsiniarneq misissuisarfiit matoqqanerat pissutigalugu ajornakusuussaaq. Tassungali taarsiullugu decembarip 25-anit januaarip pingajuanut angalasussat aallalernerminni tunillatsissimannginnermut uppernarsaateqarnissaat pisariaqassanngitsoq Namminersorlutik Oqartussat aalajangerpaat.
Sulisut sulinngiffeqassasut
Siumup ”Juullip ukiutoqqallu akornanni nakkutigineqanngitsumik angallannermik” taaginnarnissaa naammannginnerarpaa.
- Nunarsuup sinnerani nunat peqqussutinik sukaterileruttorfianni nunatsinni Naalakkersuisut killormorluinnaq juullikkunni, inuillu pisarnermiit angalaneruffianni, angallannikkut killilersuutinik atorunnaarsitsiniarput, Vivian Motzfeldt tusagassiuutinut nalunaarummi allappoq.
- Taamaalilluni nualluutip siaruaalluarnissaannut matoq ikersinneqaannarani qiversivillugu ammarneqarpoq.
- Taamaammat juullip ukiutoqqallu nalaani, iliuusissatut siunniunneqartut pissutsinut naapertuutinngilluinnartut Siumumi isumaqarpugut
- Nuummi qasukkaaneq Siumumit assut ernumanartoqartillugulu naammaginngilarput. Ataqatigiittumik tuniluuttoqarneratigullu aqunneqarsinnaasumik ingerlatsisoqassasoq Naalakkersuisut qulakkiigassaraat.
AAMMA ATUARUK Decembarip 25-anit januaarip pingajuanut: Nuummiit aallartussat misissortittariaqanngitsut
Sulisut sulinngiffeqartussaanerat misissuisarfiup matoqqanissaanut pissutaavoq. Tamanna peqqissutsimut naalakkersuisup, Kirsten Fenckerip (Naleraq) KNR-imut oqaatigaa.
- Juullikkunni peqqinnissaqarfiup sulisui nalinginnaasumik ikilisarput. Taamaattumik nukiit peqqinnissaqarfimmi napparsimasunut atorniarlugu taamatut matusigallarnissamik aalajangernikuuvugut.
Inuit suli angalasinnaasut
Taassuma juullikkut nalaanni pinasuartumik ikiortariaqartut qanoq iliussanersut naluaa. Misissorniarluguli oqaatigaa.
Akiuussutissamik tamakkiisumik kapitissimanngitsut aallarsinnaapput, apuuffissaminnulli tikikkunik toqqaannartumik angerlarsimaannariartussapput. Taakkulu tunillatsissimannginnerminnik uppernarsaatissarsinissami tungaannut angerlarsimaannassapput. Tikiffigisaanni misissortinnissaq periarfissaanngippat ulluni 14-ini mattusimasoqassaaq.
- Siornatigut soorlu oqareernitsitut ullut tamaasa nalilersortarpagut nalunaarutit qasukkassanersut imaluunniit sukatissanersut. Aamma tusagassiortunut katersortitsigatta taamatut nalunaaruteqarpugut. Eqqaasinnaavaralu ullumi nalunaarutit atuuttut nalilersoqqinneqartussaammata, Kirsten Fencker oqarpoq.
AAMMA ATUARUK Tamaat isigalugu: Coronavirus pillugu killiffik
- Iliuusissaq pitsaanerpaaq, illoqarfinni tamani misissorneqarsinnaasuugaanni taavalu akunnerit 48-t iluani akissutersisinnaalluni. Kisianni tassa nunarput ima isorartutigitillugu peqqinnissaqarfimmilu sulisussaaleqinerit atuutsillugit nalunaarut una nuna tamakkerlugu atuuttoq tassa taamatut aalajangernikuuarput, innuttaasut tamarmik suli angalasinnaatillugit.