Decembarip 25-anit januaarip pingajuanut: Nuummiit aallartussat misissortittariaqanngitsut

Nuummi misissuisarfik juullikkut nalaanni matoqqassaaq, taamaammat piffissami tassani tamakkiisumik akiuussuserneqarsimanngitsut Nuummiit aallarniartut misissortittariaqanngilaq.
Nuummi misissuisarfik. Assi © : KNR
Allattoq Nutaarsiassaqartitsivik / Nyhedsredaktionen
decembarip 17-at 2021 11:22

Tamakkiisumik akiuussuserneqarsimanngitsut angalaniarunik tunillatsissimannginnermut uppernarsaammik, sivisunerpaamik akunnernik 48-nik pisoqaassusilimmik takutitsisinnaanissaq nalinginnaasumik piumasaqaataavoq.

Tamanna assersuutigalugu Danmarkimut imaluunnit nunatsinni illoqarfinnut nunaqarfinnullu angalaniarnermi atuuppoq.

Nuummili misissuisarfik juullikkut nalaanni decembabrip 24-anit 26-anut aamma decembarip 31-ani matoqqasussaavoq.

Taamaammat Namminersorlutik Oqartussat coronamik tunillatsissimannginnermut uppernarsaateqaqqaarluni angalasinnaaneq unitsikkallarniarlugu aalajangerpaat.

Taamaammat 2021-imi decembarip 25-annit 2022-mi januaarip pingajuat ilanngullugu misissorteqqaarsimanissaq piumasaqaataassanngilaq.

Namminersorlutik Oqartussat tusagassiuutinut nalunaarummi allapput.

Tamakkiisumilli akiuussuserneqarsimanngikkuit apuuffissannut tikikkuit angerlarsimaannartussaassaatit.

Assersuutigalugu Nuummiit Ilulissanut angalasut tamakkiisumik akiuussuserneqarsimanngitsut Ilulissani angerlarsimaannartussaatitaassapput, coronamullu misissortillutik. Coronamik tunillatsissimannginneq uppernarsarneqarpat angerlarsimaannartussaatitaaneq atorunnaassaaq.

Misissortinngikkaanni coronamik ersiuteqarani ulluni 14-ini angerlarsimaannartoqassaaq.

Tamakkiisumik akiuussuserneqarsimasut angerlarsimaannartussaatitaaneq coronamullu misissortinnissaq eqqarsaatiginagu angalasinnaapput.

Suli pitsaanerulernissatsinnut ikiortigut! Nutaarsiassamut malugisaqaruit uunga allaffigitigut.

Aamma atuaruk