Siumup marlunnik qinigaaffeqartarneq atulerseqqinniaraa

Marlunnik qinigaaffeqartarnerup atorunnaarnissaa Siumumi amerlanerussuteqartut partiip nuna tamakkerlugu 2017-imi ataatsimeersuarnerani aalajangeraluarpaat.
Assi © : KNR
juulip 09-at 2019 09:59

Tamannali kukkunerusoq, Siumup allattaa Mikael Petersen oqarpoq.

Sermitsiaq.AG taama allaaserisaqarpoq.

Siumup siulersuisuisa marlunnik qinigaaffeqartarsinnaanerup atuutilerseqqinnissaa pillugu nuna tamakkerlugu 2020-mi ataatsimiinnermi siunnersuuteqarnissaat pilersaarutaavoq.

Sermitsiaq.AG atuartartumik marlunnik qinigaaffeqarneq qanoq isumaqarfigineraat pillugu juunip ulluisa 27-anni taasisitsivoq. Taasisunilu 769-iusuni 707-it marlunnik qinigaaffeqartarneq atorunnaarsinneqartariaqartoq isumaqarput.

Taannali Siumullu nuna tamakkerlugu 2017-imi ataatsimiinnerani aalajangigaq Siumup siulersuisuisa isumaannik allannguinngillat. Marlunnik qinigaaffeqartitsinngikkunik pissaanermik annaasaqaratarsinnaallutik siulersuisut isumaqarput.

- Marlunnik qinigaaffeqarneq atorunnaarsikkutsigu, taava pissaaneq sunniisinnaanerlu annaassavagut, soorlu Inatsisartuni kommunalbestyrelsenilu. Pissutsillu maannakkutut itsillugit tamassumunnga akissaqanngilagut, Mikael Petersen Sermitsiaq.AG-mut oqarpoq.

Siumumit politikerit pingasut ullumikkut marlunnik qinigaaffeqarput. Tassalu Kommuneqarfik Sermersuumi ilaasortaq Laura Taunajik, Qeqqata Kommuniani ilaasortaq Henrik Fleischer Kommune Kujallermilu ilaasortaq Anders Olsen.

Siulersuisut partiip immikkut maleruagassaa atorlugu Siumumi amerlanerussuteqartut aalajangigaannit allaanerusumik iliuuseqarsinnaapput.