Siumup anguniagaa: Kalaallisut oqaatsit 2025-imit ingerlatsivinni atorneqassapput
Namminersorlutik Oqartussat suliffeqarfiutaani atorfillit kalaallit oqaasiinik ukiut sisamat qaangiutsinnagit atuisinnaalissapput. Tamanna Siumup qineqqusaarutigaa.
Partiip Inatsisartunut qinersinissamut qineqqusaarutaani oqaatsit pillugit ima allassimasoqarpoq:
Siumup nunatsinni suliffeqarfiit pisortat ingerlataat tamarmik oqaatsit pisortatigoortut - Oqaatsivut - atorlugit ingerlatsiviussasut anguniarpaa. Siumup pisortatigoortumik oqaatsit tamakkiisumik atuutsinneqalissasut kingusinnerpaamik ukioq 2025 nallertinnagu anguniarpaa.
Tamannali sulisut kalaallisut oqaaseqartuunngitsut ukiuni tullerni sisamani kalaallisut oqaluttalersimanngippata ajattornissaannik isumaqanngitsoq, Siumup siulittaasua, Erik Jensen KNR-imut oqarpoq.
- Soraarsitsiortuinermik kinguneqartitsiniarnertut nipilersorneqarnissaa taanna pissusissamisuunngilaq, tamanna siunertaanngilaq.
Ataatsimeersuarnerni pisussaaffinngussasoq
Kalaallisut oqaatsit Namminersorlutik Oqartussat suliffeqarfiutaanni tamakkiisumik atuutilersinneqarnissaat Siumup anguniaraluarlugu ullumikkut aningaasaliissutaasartut qaavatigut aningaasaleeqqikkusunngilaq.
Ingerlatseqatigiiffiit ataatsimeersuarneranni sulisunut kalaallisut oqaatsinik ilinniartitsinerusalernissaq naalakkiutaasinnaasoq, Erik Jensen isumaqarpoq.
- Ingerlatseqatigiiffiit suliffeqarfiit namminneq aningaasaqarnermikkut nammassinnaavaat,
piumasaqaatit ersarissut sakkortunerusullu apuunneqarnerisigut.
- Ataatsimilluunniit allamiuluarnertut ajattuiniarnertulluunniit isumaqanngilaq. Kisianniliuna nunatsinni oqaatsitta annertunerusumik nukittorsarneqarnissaannut aqqutissiuussiniartugut.
Pisortat suliffeqarfiini sulisut qanoq oqallorissitigissanersut Erik Jensenip naliliiffigerusunngilaa.
- Pingaarnerpaarpaajuvoq oqaatitsinnik atuisinnaanissaat, kiffartuussaminnut akisinnaallutillu paasinartumik ingerlatsisinnaanissaat taanna qulakkeerniarneqarpoq, Erik Jensen oqarpoq.