Siumumit qinigassanngortittoq: Ilinniarsimasut nunatta avataaniikkunik aningaasanik utertitsissasut
Kalaallit ilinniartut ilinniakkaminnik naammassinninnermi kingorna nunatsinnut uteqqinngikkunik ilinniakkaminnut akiliuteqassapput.
Siumumit Inatsisartunut marsip aqqarnanni qinersinissamut qinigassanngortittup, Poul Olsenip tusagassiuutinut nalunaarutaani siunnersuut nutaaq taama ilaqarpoq.
- Tassa pingaartumik uanga illillu inuiaqatigiinni akilikkatsinnik ilinniariartut kikkulluunniit nunatta avataanut nunatsinnut uterlutik inuiaqatigiinnut utertitseqqillutik tunniussinissaat pisariaqartipparput uanga illillu nunatsinni siuarsaaqataanitsinni peqataanissaat taanna pisariaqartipparput, taanna KNR-imut oqarpoq.
Poul Olsenip oqarnera naapertorlugu ilinniartut ilinniakkaminnik naammassinninnermi kingorna nunatsinnut angerlaqqinngikkunik ilinniakkamut nunatta aningaasaliiffigisaanut utertitsillutik akiliuteqassapput. Akiligassaq unitsinniaraanni nunatsinnut uterluni inuiaqatigiinnut siuarsaaqataassasut, Sisimiunit qinigassanngortittoq oqarpoq.
Poul Olsen Inatsisartunut qinigaassaguni nunatta avataani ilinniarnermut piumasaqaatit ersarinnerunissaat anguniagaraa.
Inuit nunatta avataaniittut nunatsinnut angerlarteqqinnissaanut politikkikkut oqallittoqarnerata ilutigisaanik taanna taama siunnersuuteqarpoq.
Nunatsinni innuttaasut ikiliartornerat qimerlooraanni innuttaasut ukiut 15-it qaangiuppata 10.000-inik ikilissangatinneqarput.
Tamatuma saniatigut sulisussaaleqisoqarpoq. Taamaammat kalaallit tusindilikkaat nunatta avataaniittut – pingaartumik ilinniartut polikerinit isiginiarneqarput.
Poul Olsenilu aalajangiisinnaagaluaruni aningaasatigut aaqqiissuteqarneq atorneqassaaq.
- Tassa taanna periarfissanut ilaaginnarpoq. Kisianni oqaloqatigiissutissarput pingaarnerpaaq tassaavoq - pisariaqartippatsigit atorfissaqartippatsigit, nunatsinnut uterlutit aaqqitassanik aaqqiiniarnitsinnik ikiortigut, taanna oqarpoq.
Inissiaq akikinnerusut ilaqutariittullu inuuneq pitsaanerusoq
Kalaallit Danmarkimi ilinniartut politikkikkut oqaluuserineqaqattaartarput.
Folketingimut ilaasortap, IA-meersup, Aaja Chemnitzip, Demokraatit siulittaasuata, Jens-Frederik Nielsen aamma Atassummi siulittaasup tulliata, Bentiaraq Ottosenip peqqinnissaqarfiup pitsanngorsarnera amerlanerusut nunatsinnut angerlarteqqinnissaannut pingaarutillip ilaattut oqaatigisimavaat.
- Naalagaaffinngornissamut oqallinnerit annertoorujussuit maannakkut pineranni, uagut tungitsinninngaanniit ernummatigisarput annertooq tassaavoq Peqqinnissaqarfipput. Ullumikkut artorsareeqaaq illuatungaanili aningaasalersornerusariaqarparput aamma pitsanngorsartariaqarparput, Bentiaraq Ottosen KNR-imut qaammatip siuliani oqarpoq.
Kalaallit poltiikerit innuttaasumi ikiliartornerannik ernumassuteqartuni kisimiinngillat.
Sumiiffiit namminersortut soorlu Savalimmiut, Finlandimi Åland Spaniami Catalonia ilinniartunik ilinniakkaminnik naammassinnissimasunik angerlartitsiniarsaripput.
- Nunartik qimallugu ilinniariartornikut angerlarteqqinniarsaralugit suliniutinik pilersitsisoqarnikuuvoq. Tamanna inissianik akikinnerusunik, ilaqutariittut inuunermik ajunnginnerusumik akissarsianillu qaffasinnerusunik ussassaaruserluni iliuuseqartoqarnikuuvoq, Ilisimatusarfimmi Inuiaqatigiilerinermut, Aningaasaqarnermut Tusagassiuutilerinermullu Instittuttimi Politologimi professori, Maria Ackrén KNR-imut sapaatip akunnerani matumani siusinnerusukkut oqarpoq.
