Borgmesterinngortitsiniarnermi uiverneq: Innuttaasut patajaatsumik sulisoqarnissaanik pisariaqartitsisut

Naleqqap, IA-p Demokraatillu suleqatigiilernerat inissittoq, Naleqqameersup Jens Vetterleinip ataasinngornermi uppernarsarpaa. 

Borgmesterinngortitsiniarnermili nalorninartoqarnikuunera peqqutaalluni isumaqatigiissut atsiorneqareerpat aatsaat inissinneqarnissaa qulakkeerneqassaaq. 

Kommunit allaffeqarfianni isumaqatiginninniarnerit ingerlaneqarneranni, innuttaasut borgmestereqaratillu ersarissunik akissutissanik pisariaqartitsipput.

Taamaammat borgmesteritaarniarnermi uivertoqarnera pillugu innuttaasut isumaat eqqarsaatersuutaallu pillugit KNR Aasianni innuttaasunik aqqusinermi apersuivoq. 

Innuttaasut patajaatsumik sulisoqarnissaanik pisariaqartitsisut 

Borgmesterinngortoqarnissaa pillugu apersorneqartut isumaat assigiinngikkaluarlutik, tamarmik patajaatsumik sulisoqarnissaa kissaatigaat.  

- Assut uaguulluni toqqissisimananngilaq, tassami qinikkagut inatsisit malillugit qinigaapput taakkulu malillugit aalajangersaaniarsarissapput, soraarneq Kristine Reimer oqarpoq, nangillunilu: 

- Eqqarsarluarlutik suleqatigiilernissaat patajaatsumillu aalajangiisoqarnissaa erininarsivoq.

Soraarneq Kristine Reimer patajaannerusumik suleqatigiittoqarnissaanik pisariaqartitsivoq. Assi © : Samuel Kleemann/KNR

Taanna kommunimi aalajangiinernut tunngatillugu suleqatigiittoqarnerata amigarnera pillugu toqqissisimanngitsuni kisimiinngilaq.  

- Assigiinngitsunik pilersaaruterpassuaqaramik ilaalu pilersaaruteqarpiaratik. Toqqissisimananngilaq, Bettina Geisler ilinniartitsisoq oqarpoq, nangillunilu: 

- Ersarissumik akissuteqarsinnaanngillat, taamaalilluni tatiginissai ajornakusoornarpoq.  

Isummat assigiinngitsut 

Naak borgmesterinngortoqarnissaa pillugu innuttaasunut toqqissiviilliortitsisoqaraluartoq piffissami qaninnermi allanngortoqarnissaanut periarfissaqarmat piffissaq pissanganarpoq,. 

- Borgmesterissarsiornerup massakkut killiffianut tunngatillugu taakkuulluni ilungersunassaaq – nunaqqataasuulluni pissanganarpoq, Bettina Geisler oqarpoq.

Bettina Geisler ilinniartitsisuusup borgmesterissarsiorniarnermi isumaqatiginninniarnerup malinnaaviginera pissanganartippaa. Assi © : Samuel Kleemann/KNR

Taassuma politikerinik akisussaassusilinnik tatiginartunillu pisariaqartitsineq aamma erseqqissarpaa – pingaartumik aningaasaqarnikkut ilungersuaffiusumi. 

- Piisaarsinnaanngilagut allanngortitererujussuarlutalu. Allannguisoqarniarpat qanoq naleqarnersoq misissuisoqaqqaartariaqarpoq, Bettina Geisler oqarpoq.  

Allannguisoqarnissaanut piffissanngortoq  

Partiini maannakkut amerlanerussuteqartoqanngikkaluartoq, allannguerusunnerup politikerit suleqatigiilersissagaat innuttaasunit kissaatigineqarpoq.  

- Ukiut kingulliit immaqa arlaatigut ingerlatsinerliortoqarnerata kinguneranik eqqissillutik isumaqatigiinniarnerat taanna paasilluarsinnaavara aamma maajip aallartilaarnerata tungaanut isumaqatigiinniartussaagamik, Thomas Siegstad, Aasianni maskiinanik katiterisartoq oqarpoq, nangillunilu: 

Thomas Siegstadip maskiinanik katiterisartup, isumaqatiginninniarnerit sivisusinnaanerat paasisinnaavaa. Assi © : Samuel Kleemann/KNR

- Pissusissamisooraluarpoq partii angineq isumaqatiginninniarnermi aqutsissasoq, allannguerusuttullu suleqatigiissinnaassasut.  

Kommune Qeqertalimmi innuttaasunit allannguerusunneq ersarippoq. Kisianni pissangallutik, toqqissisimanatilluunniit qaqugu tungaanut utaqqinissaat suli nalunarpoq.  

Partiit taakku pingasut isumaqatigiissusiaat påske nallertinnagu saqqummiunneqassasoq, Kristian Jeremiassenip IA-meersup neriuutigaa.