Siumukkut Niels Thomsen tapersersorniarpaat
Ivigaaraasanik qallikkanik arsaaffiliornissamut pilersaarusiornissaq 1 million koruuninik aningaasaliiffigineqassasoq Naalakkersuisut siunniuppaat. Ivigaaraasanik qallikkanik arsaaffiliornissamut siunnersuuteqartoq Niels Thomsen 2012-mi aningaasanut inatsisissatut siunnersuutip aappassaanniinnginnerani allannguutissatut siunnersuuteqarniarpoq.
Niels Thomsen pakatsivoq pingasunngorneq septembarip 21-iat 2012-mi aningaasanut inatsissatut siunnersuut siullermeerlugu saqqummiunneqarmat. Tassan paasinarsivoq pilersaarusiornermut taamaallaat 1 millioner koruuninik immikkoortitsisoqarniartoq arsaaffiilli sananissaannut aningaasaliinissaq pilersaarutaanani. Niels Thomsenip naatsorsorsimavaa ivigaaraasanik qallikkanik Nuummi, Sisimiuni Ilulissanilu arsaaffiliornissaq 15 millioner koruuninik akeqassasoq. Taamaammat suliniut suli 14 millioner koruuninik amigaateqarpoq.
Niels Thomsenip nammineerluni nassuerutigaa siunnersuutip saqqummiuteqqaarnerani oqaasertaa pissutaasinnaasoq 1 millioner koruuniinnarnik aningaasaliisoqarneranut.
Siunnersuut upernaaq Niels Thomsenip saqqummiukkamiuk allappoq: "Nuummi, Sisimiuni Ilulissanilu ivigaasanik qallikkanik arsaattarfiliornissap pilersaarusiorneqarnissaanut 2012-mi aningaasanut inatsisissatut siunnersuummi aningaasanik immikkoortitsinissamik Naalakkersuisut peqqunneqarnissaannik Inatsisartut aalajangiiffigisassaattut siunnersuut".
Tamannalu tassa Naalakkersuisut malippaat pilersaarusiorneq kisiat aningaasaliiffigigamikku sananissaat aningaasaliiffiginagu.
Niels Thomsen maanna nalunaarpoq 2012-mi aningaasanut inatsisissatut siunnersuutip aappassaanniinnginnerani allannguutissatut siunnersuuteqarniarluni. Tassuuna qulakkeerniarpaa ivigaasanik qallikkanik arsaaffiit sananissaat aamma aningaasaliiffigineqassasoq.
- 16-nut kisitsikuttoorsinnaavunga, aamma qularinngilara amerlanerussuteqartut suli tunuliaqutaralugit, Niels Thomsen oqarpoq.
Maannalu ilimanarluarpoq Siumukkormiunit taperserneqassasoq.
- Siumup gruppeani eqqartoratsigu Niels Thomsen allannguutissamik siunnersuuteqassappat tapersersorniarlugu aalajangerpugut. Tassa imaappoq ikinnerpaamik 16-ulluta tapersersussavarput, Siumut sinnerlugu aningaasaqarnermut ataatsimiititaliami ilaasortaq Finn Karlsen KNR-imut oqarpoq.
