Siulittaasunngorniunneq sakkortusivoq Motzfeldtilu isornartorsiuivoq: Kielsenip parteeqatini sioorasaartarai
Vivian Motzfeldt naapertorlugu Siumup iluani pissutsit pitsaanngillat.
Siumup Naalakkersuisullu siulittaasuat, Kim Kielsen, taassumalu tapersersortai aqutsinermut isumaqataanngitsunik partiimit anisitsinissamik sioorasaarisarsimasut, Vivian Motzfeldt nittartakkamini allappoq.
Sioorasaarineq
Upernaakkut ataatsimiinnissamik aalajangernini pillugu nammineq sioorasaarneqarsimalluni oqarpoq.
- Ilaatigut oqaatsit ima nipeqartut anngunneqartarlutik: Siumup Inatsisartut siulittaasuattut issiatippaatsit upernaakkullu ataatsimiinnissaq attatiinnarniarukku inissisimaffiit nalilersorneqartariaqarpoq!, Vivian Motzfeldt nittartakkamini allappoq.
AAMMA ATUARUK Upernaakkut ataatsimiinnissamut piareersaanerit aallartittut
Kim Kielsen upernaakkut ataatsimiinnissaq coronavirusi pissutigalugu taamaatittariaqartoq taamani oqarpoq. Vivian Motzfeldtilli tamanna akerlilerpaa, sivikitsumillu upernaanerani ataatsimiittoqarluni.
Inatsisartut oqartussaaffiinik ataqqinninngitsoq
Ataaatsimiinnissamillu aalajangiisussat tassaatuaasut Inatsisartut Vivian Motzfeldtip erseqqissaatigaa.
- Arajutsiuminaappoq qulequttani amerlavallaarujussuartuni pissaanerup Inatsisartut Naalakkersuisullu akornanni avissimanera ataqqineqarnani akuleruffigineqartuarmat, soorlu Inatsisartut Naalakkersuisut sulinerannut nakkutiginnittussaanerat aamma aporfilersorneqartuartoq, Vivian Motzfeldt allappoq.
AAMMA ATUARUK Vivian Motzfeldt Kimimut tatiginnikkunnaarnissaq pillugu: Taamaammat isumaga allanngorpoq
Nipisattassiissutinut suliaq nukippassuarnik atuiffiusoq, Vivian Motzfeldt aamma allappoq. Nipisattassiissutinut suliami pineqartoq tassaavoq, Naalakkersuisut siulittaasuat, Kim Kielsen, nipisattassiissutinik amerlileeqataagami suliamut attuumavallaarsimanersoq, tassami taamaalinerani umiatsiani aalisartumut attartugassanngortissimavaa. Kukkunersiuinermut ataatsimiititaliap suliaq misissuiffigaa sakkortuumillu isornartorsiuteqarluni.
Siumut ataatsimeersuassaaq
- Kim Kielsen Siumumut oktobarimi 2014-imili siulittaasuuvoq.
- Partii Nuummi novembarip ulluisa 27-annit 29-annut ataatsimeersuassaaq.
- Tassani siulittaasumik qinersissapput.
- Kim Kielsenip Vivian Motzfeldtillu saniatigut Erik Jensen siulittaasutut qinigassanngortippoq.
Nipisattassiissutinut suliaq kukkunersiunermut ataatsimiititaliap suliassaanut ilaanersoq Kielsenip naalakkersuisoqarfiata takujuminaatsippaa. Tamannalu nalunaaruteqarnera Vivian Motzfeldtip iluarinngilaa.
- Nukiit inuit ataasiakkaat kukkunerinut iluarsiiniarnermut atornagit inuiaqatigiinnut atorneqartussaapput, Siumumut siulittaasunngorniartoq KNR-imut oqarpoq.
Kukkunersiuinermut ataatsimiititaliaq nunatta karsiata naatsorsuutaanik misissuisartussaasoq naalakkersuisoqarfik tunngavilersuivoq. Nipisattassiissutinullu suliaq nunatta karsiata naatsorsuutaanut sunniuteqanngitsoq naalakkersuisoqarfik allappoq.
Kielsen siulittaasunngorniaqqinnianngikkaluartoq
Siumumit Inatsisartunut ilaasortat arfinillit Naalakkersuisunullu ilaasortaq ataaseq Kim Kielsenimik tatiginnikkunnaarlutik siorna nalunaartut aamma eqqaasitsissutigaa. Siumulli immikkoortortaqarfiini amerlanerussuteqartut Kim Kielsenimik ataatsimeersuarnissap tungaanut tapersersuillutik nalunaarput. Kielsen siulittaasutut qinigassanngortinniarnani taamani nalunaarpoq.
- Taamaalillunilu Siumup naalakkersuisuutitaqarnermini imminnut uppisinnginniassammat ataatsimeersuartoqarnissaata tungaanut ingerlaqqikkallarnissaa naaperiaassutitut tamanit isumaqatigiissutigineqarluni, Vivian Motzfeldt allappoq.
AAMMA ATUARUK Politikkikkut naliliisartoq: Siumumi suli eqqissiviilliortoqarpoq
Kielsenilli isumaani kingusinnerusukkut allanngortippaa siulittaasutullu qinigassanngortilluni.
Partiip suliassaa
KNR-ip Vivian Motzfeldt sooq taama sakkortutigisumik maanna isornartorsiuinersoq aperaa.
Taannalu akivoq, Siumup iluani assigiinngitsunik isummersorneq nukittoqutaasartoq, ukiunili kingullerni pissaanerup agguataarneqarneranik ataqqinninnginneq inuillu ataasiakkaat kisimik pissaaneqarumaneranit erloqisinneqarpoq.
Kim Kielsen apersorniarlugu attaviginiarsarivarput, sulili iluatsinnagu. Inatsisilli malillugit sulilluni Inatsisartut oqaluttarfiannit pingasunngormat oqarpoq. Siulittaasunngorniunnermullu atatillugu qanorsuaq oqaluttoqarsinnaasoq namminerlu qineqqusaarumaarluni ilanngullugu oqaatigalugu.
Siulittaasunngorniunnerlu partiip suliassarigaa, Kim Kielsen isumaqarpoq.
- Siulittaasunngorniunnermut atatillugu, taanna uagut Siumup iluanni aaqqissaqqaarparput, Kim Kielsen pingasunngormat apeqqarissaarfigineqarnermini oqarpoq.
Kim Kielsen, Vivian Motzfeldt Erik Jensenilu Siumumi siulittaasunngorniartuupput.
Siumut novembarip ulluisa 27-annit 29-annut ataatsimeersuassaaq.
