Upernaakkut ataatsimiinnissamut piareersaanerit aallartittut

Inatsisartut upernaakkut ataatsimiinnissaat kinguartinneqanngisaannarpoq, ataatsimiinnissarlu maanna piareersarneqalertoq, Inatsisartut siulittaasuat, Vivian Motzfeldt oqarpoq.

- Unitsinneqarnikuunngisaannarpoq. Nualluutip atuunnerani ineriartorneq maani malinnaaffigineqassasoq aallaqqaataaniilli aalajangerneqarnikuuvoq, taannalu siulittaasoqarfiup aallaqqaataaniilli attassimavaa, Vivian Motzfeldt oqarpoq.

AAMMA ATUARUK Illuatungiliuttut: Upernaaru ataatsimiitsiarta

Ataatsimiinnissamut piareersaanissaq Inatsisartut siulittaasoqarfiannit tamakkiisumit maanna akuersissutigineqareertoq, Vivian Motzfeldtip paasissutissiissutigaa.

- Taamaammat aallartiffissaa ulluni qaninnerusuni nalunaarutigineqarumaarpoq.

Inatsisartut upernaakkut ataatsimiinnissaat kinguartinneqartoq, Naalakkersuisut siulittaasuata, Kim Kielsenip, tusagassiortunik marsimi katersortitsinermi oqaatigaa.

Kim Kielsen partiit siuttui oqaloqatigereerlugit kinguartitsinissamik siunnersuut Inatsisartut siulittaasoqarfianut nassiullugu taamani oqarpoq. Coronavirusip akiornissaanut ukkassiniarluni taamaaliorluni oqarpoq.

AAMMA ATUARUK Inatsisartut upernaakkut ataatsimiissanngitsut

Tamannali Inatsisartut siulittaasuata akerlilerpaa. Inatsisartullu aalajangiisussaasut, Vivian Motzfeldtip ullumi erseqqissaatigeqqippaa.

- Inatsisartut Naalakkersuisullu pissaaneri avissaarsimaqqissaarput, Inatsisartullu ataatsimiinnissaannut ataatsimiinnginnissaannullu aalajangiisuusussat tassatuaapput Inatsisartunut ilaasortat.

Ilaatigut siorna ukiakkut ataatsimiinnermi oqaluuserisassat ukioq manna upernaakkut ataatsimiinnermi naammassineqartussat suliarineqassasut, aningaasaqarnermut ataatsimiititaliami taavalu kukkunersiuinermut ataatsimiititaliami ilaasortat inissititeqqinneqassasut Naalagaaffiit Peqatigiillu ataatsimeersuarnerannut aallartitassamik toqqaasoqassasoq Vivian Motzeldt nassuiaavoq.

- Taamaammat Inatsisartut ataatsimiinnerat Naalakkersuisunut suliakkersuutaarujussuanngitsumik ingerlanneqassasoq naatsorsuutigaarput, suleriaasitta peqqusinera malillugu, Vivian Motzfeldt oqarpoq.

AAMMA ATUARUK Isumaqatigiinnginneq: Inatsisartut upernaakkut ataatsimiissappat taamaatinneqassavaluunniit?

Siumup siulittaasuanut aasaru qinersinissaq pilersaarutaavoq. Vivian Motzfeldt siulittaasunngorniarpoq.

Vivian Motzfeldtilli upernaakkut ataatsimiinnissamut aalajangerneq siulittaasunngorniunnermut attumassuteqannginnerarpaa.

- Isumaqanngilanga pisumi ima imaannaanngitsigisuni siulittaasunngorniunneq taputartuutissallugu. Uanga suliassakka suliariinnarpakka. Inatsisartut siulittaasuattut suliassakka tassaapput, Inatsisartut qanoq sulinissaannut aaqqissuussinissaq, soorunami siulittaasoqarfik peqatigalugu.