Inatsisartut upernaakkut ataatsimiissanngitsut
Ukioq manna Inatsisartuni upernaakkut ataatsimiittoqassanngilaq.
Naalakkersuisut siulittaasuat, Kim Kielsen (S), ippassaq taama oqarpoq.
- Oqarsinnaavunga Inatsisartut upernaaq manna ataatsimiissanngillat. Maannakkut ilisimanngilarput nualluut qanoq ineriartussanersoq, taamaammat partiit siuttui tamarmik isumaqatigiillutik, Inatsisartut siulittaasoqarfiannut allagaqarput kissaatigalugu upernaaq manna ataatsimiinnissaq ukiamut nuunneqassasoq, Kim Kielsen oqarpoq.
Kalaallit Nunaanni coronavirusimik tunillatsissimasut katillugit quliupput - tamarmillu Nuummi najugaqarlutik. Naak Danmarkimiit Savalimmiuniillu tunillatsissimasunut sanilliullugu ikinnerungaaraluartut, sukannersumik naalakkersuisoqarpoq:
Nunatsinniit nunattalu iluani timmisartuussinerit ilaasoqanngillat. Nuummi inuit annerpaamik qulit katerisimaarsinnaapput, taakku saniatigut ilinniartfiit, paaqqinnittarfiit atuarfiillu matoqqatuneqarput.
AAMMA ATUARUK Oqartussat pinngitsaaliissummik katsorsaasinnaalersut
Nunattalu sinnerani atuarfiit aamma matoqqallutik.
Namminersorlutik Oqartussani sulisut amigaatigineqarneri peqqutaalluni ataatsimiinnissamut nukissaqartoqanngitsoq Kim Kielsen oqarpoq.
- Naalakkersuisoqarfik tamaat qiviassagutsigut, maannakkorpiaq sulisorpassuit amigaatigineqarput, taanna oqarpoq.
Taamaammallu ataatsimiinnissaq aatsaat ukiaru septembarip 25-ani pissaaq.
Inatsisissatut siunnersuutit kiisalu aalajangiiffigineqartussatut siunnersuutit aggustip 21-anni tunniunneqarsimanissaat ulluliunneqarpoq.
Inatsisartulli siulittaasuat, Vivian Motzfeldt suliamut oqaaseqarusunngilaq.
AAMMA ATUARUK Pinngitsaaliilluni nakorsaaneq inerteqquteqarnerlu: Inatsisartut taakku taasissutigissavaat
Inatsisartut immikkut ittumik ippassaq ataatsimiipput. Ullormullu oqaluuserisassatut qulequttat marluk eqqartorneqarlutik: Tassalu upernaakkut ataatsiminnissap ullulerneqarnissaa, kiisalu inatsit nukingisaarutaasoq aalajangiunneqarluni.
Inatsimmi nukingisaarutaasumi ilaatigut inuit napparsimasut napparsimanissaanillu pasitsaanneqartut, pinnngitsaalisamik misissortittalernissaat, unitsinneqarlutillu katsorsarneqartalernissaat aalajangiunneqarpoq.
Inatsip aamma katerinnerit inerteqqutaasinnaalersippai, tassa imaappoq katersuunnerit tunillaassortoqarfiusinnaasut politiinit unitsinneqarsinnaalerput. Politiit tamatumunnga atatillugu ininut eqqartuussiviup akuersissuteqarfiginngisaannut inersinnaalerput.
