Pinngitsaaliilluni nakorsaaneq inerteqquteqarnerlu: Inatsisartut taakku taasissutigissavaat

Inatsisartut pingasunngorpat immikkut ittumik ataatsimiinnerminni isummerfigisassaanni allannguutissat sukannersut ilaat tamakkuupput.

Inatsit nukingernartoq akuerineqartussaavoq – inatsisissatullu siunnersuut Naalakkersuisunut, Tunillaassortunik nappaalanersuaqarneranut ataatsimiititaliarsuarmut, Nakoraaneqarfimmut oqartussanullu allanut coronap ullormiit ullormut allanngorartup ajornartorsiutigineqarnerani nutaanik pisinnaatitsilissaaq.

Inatsisissatut siunnersuummi suliniutit qassiiusut innuttaasunut pinngitsaaliilluni iliuuseqartitsisinnaapput.

AAMMA ATUARUK Inatsisartut pingasunngorpat immikkut ittumik ataatsimiissasut

Allannguutissat tapiliussallu ilaat taasissutigineqartussat uani atuarsinnaavatit:

Pinngitsaaliilluni nakorsaaneq:

Tunillaassortunik nappaalanersuaqarneranut ataatsimiititaliarsuup kikkunnulluunniit nalinginnaasumik ulorianaateqartumik napparsimasunut imaluunniit tunillatsissimasutut pasitsaanneqartumut peqqussuteqarsinnaanermut inatsit nutaaq tapiliunniarpaa:

Peqqissaanermik suliaqartumit misissortissasoq.

Napparsimmavimmut imaluunniit uninngasarfimmut tulluartumut allamut unitsinneqassasoq.

Uninngasarfimmut tulluartumut imminut mattutsissinnaasoq.

Tamatuma saniatigut Tunillaassortunik nappaalanersuaqarneranut ataatsimiititaliarsuup inuk napparsimasumut imaluunniit nappaammik nalinginnaasumik ulorianaateqartumik tunillatsissimasutut pasitsaanneqartumut imaluunniit nappaammik pakkersimaariniarluni pinngitsaaliissummik katsorsaanermik aallartitsisinnaassaaq.

Katerinnerit:

Siunnersuutip aamma Naalakkersuisut angisuunik katerinnernik nalliuttorsiornernilluunniit pinaveersaartitsinissamut nappaammilluunniit pakkersimaarinissamut pisariaqarpat inerteqquteqarsinnaatissavai. Tamanna illup iluani silamilu pisunut aamma pisortat namminerlu aaqqissuussinerannut atuutissaaaq

Tamatuma qulakkeernissaa pillugu Naalakkersuisut eqqartuussivik akulerutsinnagu ininut allanullu isersinnaanermut pisinnaatitaaffeqassasut inatsisissatut siunnersuummi allassimavoq.

Sumiiffinnik matunisineq:

Siunnersuut akuerineqassappat Tunillaassortunik nappaalanersuaqarneranut ataatsimiititaliarsuup sumiiffinni nalinginnaasumik ulorianartumik nappaalasoqarpat nappaammilluunniit tuniluuttoqarnissaa aarlerinaateqassappat sumiiffiup matuneqarnissaa aamma aalajangersinnaalissavaa. Matusinerli piaarnerpaamik atorunnaarsinneqaqqissaaq.

Pinngitsaaliissummik kapisineq:

Nunatsinni nappaatit nalinginnaasumik ulorianaateqartut pinaveersaartinnissaat pakkersimaarnissaallu pisariaqassappat Namminersorlutik Oqartussat eqimattat aalajangersimasut aarlerinaateqartuniittut pinngitsaaliissummik kapitinnissaat pillugu malittarisassiorsinnaassapput.

Siunnersuut naapertorlugu tamanna Nakorsaaneqarfiup inassuteqarnera peqqinnissaqarfimmilu napparsimasut allat ikilisarnissaat aamma nappaatinik allanik siaruariartortunit ikilisaaniarnissaq tunngavigalugit pisinnaassaaq.

Pisortat assartuussutaat:

Tunillaassortunik nappaalanersuaqarneranut ataatsimiititaliarsuup inuit Inatsisartut peqqussutaat naapertorlugu ”nappaateqartut imaluunniit nappaammik taama ittumik tunillatsissimasorineqartut, pisortat assartuussissutaannik atuisinnaanerat inerteqqutigisinnaavaa.

Iseqqusaannginneq:

Naalakkersuisut utoqqarmiunut napparsimmavinnullu pulaarnissamut inerteqquteqarnissamut malittarisassiorsinnaassapput.

Matusineq pisariaqavissumillu paarsisoqarneq: 

Naalakkersuisut pisortat ulluunerani neqeroorutaannik, atuarfinnik ilinniarfeqarfinnillu matusigallarnissamik aalajangiisinnaassapput.

Naalakkersuisuttaaq pisariaqavisumik paarsisoqarnissaq, pisariaqavissumik atuartitsinissaq, uppernarsaatit, misilitsinnerit, soraarummeernerit pillugit malittarisassiorsinnaassapput.

AAMMA ATUARUK Inatsisartut immikkut ittumik ataatsimiinnissaat: Ima iliussasut

Inatsisissatut siunnersuut tamaat uani atuarsinnaavat.