Inatsisartut pingasunngorpat immikkut ittumik ataatsimiissasut
Kim Kielsen coronap ajornartorsiortitsinera pissutigalugu inatsimmik nukinginnartumik piaartumi atulersitsiniarluni Inatsisartuni immikkut ittumik ataatsimiititsiniarpoq.
Pingasunngorpallu ataatsimiittoqassaaq. Inatsisartunili ilaasortat 31-t tamarmik taasiartorsinnaanngillat. Nunatsinnimi coronap ajornartorsiortitsinera pissutigalugu angalaqqusaasoqanngilaq, inatsisissatullu siunnersuutit suliarineqarnissaanut ilaasortat ikinnerpaamik 16-it peqataasussaapput.
Inatsisartuni ilaasortat 13-it Nuummeereerput. Taamaammat pingasut amigaataapput.
Sinniisut aggersarneqartut
Ilaasortanut pingasunut taakkununnga sinniisut aggersarneqarput – sinniisullu taakku illoqarfiit pingaarnersaanneereerput.
Sinniisut Atassummit ataaseq, Inuit Ataqatigiinnit ataaseq Partii Naleqqamiillu ataaseq aggersarneqarput, taakkumi ilaasortanut sineriatsinniittunut angalaqqusaannginneq pissutigalugu aggersinnaanngitsunut sinniisuupput.
AAMMA ATUARUK Inatsisartut immikkut ittumik ataatsimiinnissaat: Ima iliussasut
Pingasunngorpallu ataatsimiinnissamut immikkut ittunik aamma malittarisassaqassaaq:
Assersuutigalugu inimi ataatsimiiffiusumi amerlanerpaamik qulit isersimasinnaapput.
Ilaasortat sinneri allaffimminnit oqallinnermut malinnaassapput.
Inatsisartut siulittaasoqarfiata ataatsimiiffissamut malinnaasoqariartorsinnaanavianngitsoq aamma nalunaarutigaa. Ataatsimiinnermut malinnaanissamut soqutiginnittut nittartakkakkut tv-kkulluunniit malinnaasinnaassapput.