Inatsisartut immikkut ittumik ataatsimiinnissaat: Ima iliussasut
Inatsisartut Nukinginnartumik inatsisiliornissaq qulakkeerniarlugu immikkut ittumik, Kim Kielsenimit ataatsimiigiaqquneqarput.
Vivian Motzfeldtilli Inatsisartunilu siulittaasoqarfiup Inatsisartunut ilaasortat ikinnerpaamik 16-it illoqarfiit pingaarnersaanni ataatsikkut ataatsimiittarfimmiinissaat ajornakusoortippaat.
AAMMA ATUARUK Kim Kielsen immikkut ittumik ataatsimiigiaqqusiniartoq
Kielsen sooruna nukinginnartumik aggersaasoq?
- Naalakkersuisut siulittaasuat, Kim Kielsen Inatsisartuni immikkut ittumik ataatsimiigiaqqusivoq.
- Naalakkersuisut corona pillugu nukinginnartumik inatsisiliornissaq naalakkersuisut qulakkeerusuppaat.
- Naalakkersuisut inatsit nukinginnartoq coronaviruseqartoqarnerani ilaatigut malittarisassanik atuutsitsinissamut oqartussanut piginnaatitsilertussaq qulakkeerusuppaat.
-
Assersuutigalugu pisiniarfiit malittarisassat unioqqutillugit ammasut politiinit ullumikkut matuneqarsinnaanngillat, naak pisortat innersuussutigereeraluaraat matoqqatinneqassasut.
- Qaqugu immikkut ittumik ataatsimiittoqarnissaa suli ullulerneqanngilaq.
Sineriammiit Nuummut timmisartorsinnaanngitsut
Nuulli coronavirus pissutigalugu matoqqalluinnarpoq, illoqarfiinniillu nunaqarfinniillu illoqarfiit pingaarnersaannut angalasoqaqqusaanngilaq.
Inatsisartunut ilaasortat ilaat taamaallat 13-it maannakkut Nuummiipput, inatsimmillu nutaamik taasinissamut ilaasortat ikinnerpaamik 16-iusariaqarlutik.
- Nuuk matoqqavoq sinerissatsinnullu illersuinissarput pingaartikkatsigu sinerissatsinniit ilaasortanik tikisitsisinnaanngilagut, tassalu tassuunakkut unammillerneqarneq takuneqarsinnaalluni, Inatsisartut siulittaasuat, Vivian Motzfeldt oqarpoq.
Inatsisinik allannguisoqassatillugu qarasaasiatigut attaveqaatit imaluunniit oqarasuaatit atorlugit ataatsimiinnerit ingerlanneqarsinnaanngillat. Maleruagassanimi inatsisinik allannguisoqassatillugu ilaasortat ataatsimiittarfimmiittussaasut allassimavoq.
- Tassa suleriaatsitsinni allassimavoq, inatsisit suliarineranni Inatsisartunut ilaasortat timikkut najuullutik inersuarmi suliaq tamanna naammassigaat. Taamaammat ullumikkut suleriaaserput taanna malitarput atussagaanni tamanna periarfissaanngilaq, Vivian Motzfeldt oqarpoq.
Ima ataatsimiittoqassaaq
Vivian Motzfeldip oqarnera naapertorlugu Inatsisartunut ilaasortat sinniisissaasa Nuummiittut ataatsimiigiaqquneqarnissaat aaqqiissutaasinnaasut ilagaat.
Kisianni inuit amerlanerpaamik qulit inimi ataatsimi katersuuttarnissaannik oqartussat piumasaqaataat aporfiuvoq.
- Taama amerlatigisut isersimaqatigiinnissaat ajornarpoq. Taamaattumik inuit qulit najuunnissaat pillugu piareersaatit manna ingerlapput aamma ilaasortat najuuttut marlunnut avillugit taasitinneqarnissaat piareersarneqarluni. Taamaalilluta inuit qulit sinneqartut inimi isersimaqqusaanerat unioqqutissanngilarput, Vivian Motzfeldt oqarpoq.
AAMMA ATUARUK Ullumikkut coronamut killiffik: Nuummi tunillatsissimasoq alla paasineqartoq
Kikkulli ataatsimiittarfimmiittarnissaannut pilersaaruteqareerpoq:
Naalakkersuisoq inatsisissatut siunnersuummik saqqummiussisussaq.
Partiit ataasiakkaat oqaaseqartui. Inatsisartuni partiit arfineq-marluupput.
Ataatsimiinnermi aqutsisoq taamatullu Inatsisartuni allaffiup pisortaa.
Taakku katillugit quliupput.
Taasilerunillu isersimasut siuliit taasereerpata allat inersuup silataani malinnaareerlutik inersuarmut isissapput taasillutillu.
Immikkut inatsisissatut allannguutissat suunersut KNR-imiit pissarsiariniaraluarpagut, Naalakkersuisunilli taakku suliarineqaleruttormata pissarsiarisinnaanatigit.
