Kim Kielsen immikkut ittumik ataatsimiigiaqqusiniartoq
Naalakkersuisut siulittaasuata Kim Kielsenip Inatsisartut immikkut ittumik ataatsimiigiaqquniarpai.
Coronavirusip tuniluutilertunnginnissaa pillugu nukinginnartumik inatsisiliornissaq naalakkersuisut qulakkeerusuppaat, Inatsisartullu tamanna pillugu immikkut ittumik ataatsimiigiaqquneqarnissaat, Naalakkersuisut siulittaasuata Kim Kielsenip kissaatigaa, immikkullu ittumik ataatsimiigiaqqusisoqarnissaanut Inatsisartut siulittaasoqarfiannut qinnuteqarluni.
AAMMA ATUARUK Ullumikkut coronamut killiffik: Nuummi tunillatsissimasoq alla paasineqartoq
Assersuutigalugu pisiniarfiit malittarisassat unioqqutillugit ammasut politiinit ullumikkut matuneqarsinnaanngillat, naak pisortat innersuussutigereeraluaraat matoqqatinneqassasut.
Nuummi katerinnermut killilersuinerit ataatsimiinnissamut akimmiffiusut
Inatsisartulli aalajangiisinnaassuseqassappata ilaasortat 31-t akornanni ikinnerpaamik 16-it ataatsimiittarfimmi najuuttussaapput, coronavirusilli akiorniarneqarneranut atatillugu inuit Nuummi aaqqissuussanut amerlanerpaamik quliunissaat pisortat innersuussutigaat.
Taassuma saniatigut inatsisartuni ilaasortat Nuummiittut 16-iunngillat, sinerissaminngaanniillu timmisartuussiunnaarallartoqarluni. Inatsisartullu aalajangiisinnaassuseqarnissaat qanoq ililluni qulakkeerneqarsinnaanersoq Inatsisartut Siulittaasoqarfiannit misissuiffigineqaleruttorpoq.
AAMMA ATUARUK Tamaat isigalugu: Coronavirus pillugu killiffik
Inatsisartut immikkut ittumik ataatsimiinnissaat suli ullulerneqanngilaq.
