Illuatungiliuttut: Upernaaru ataatsimiitsiarta

Kim Kielsenip Naalakkersuisullu upernaaru ataatsimiinnissaq coronavirusi ajornartorsiortitsimmat  siulittaasoqarfimmut taamaateqquaat.

Illuatungiliuttulli tassaasut Inuit Ataqatigiit, Partii Naleraq, Atassut Suleqatigiissitsisullu - coronavirusip ajornartorsiortitsinera peqqutigerpiarlugu - Inatsisartut upernaaru piaartumik ataatsimiissasut maanna piumasaraat.

- Ullut imaannaanngitsut nalaappavut. Qujanartumillu napaatip coronap peqqissutsikkut ajornerusumik eqqunngilaatigut. Ulluinnarnili inuunitsinni aningaasarsiornitsinnullu sunniuteqalereeqaluni, illuatungiliuttut tusagassiuutinut ataatsimut taama nalunaarput.

Siunissami aningaasarsiorneq isumakulunnartoq

Illuatungiliuttut Aningaasaqarnermut Siunnersuisooqatigiit coronavirusip ajornartorsiortitsineranik missiliuigallarnerat tunngavilersuutigaat. Taanna naapertorlugu nunatsinni aningaasarsiorneq coronavirusip ajornartorsiortitsineranit eqqugaarujussuarsinnaavoq.

Nunatsinni aningaasarsiorneq ukioq manna 3,8 procentinik siuariaateqarfiussasoq coronavirusip ajornartorsiortitsilinnginnerani ilimagisaavoq, nunarpulli 2020-p qiteqqunnerani ammariartoqqinneqassappat 3 procentinik kinguariaateqarfiussasoq maanna ilimagisaalluni.

AAMMA ATUARUK Isumaqatigiinnginneq: Inatsisartut upernaakkut ataatsimiissappat taamaatinneqassavaluunniit?

Nunatta avammut matunera sivitsorneqassappat nunatsinni aningaasarsiorneq 7,4 procentinik kinguaariaateqarfiujumaartoq, Aningaasaqarnermut Siunnersuisooqatigiit nalilerpaat.

Taamaattumik illuatungiliuttut Kim Kielsenip Naalakkersuisoqatigiillu Inatsisartut upernaaru ataatsimiinnissaannik taamaatitseqqusinerannut akerliunertik ilutigalugu Inatsisartut piaartumik ataatsimiinnissaat piumasaraat. Inatsisartummi aningaasaqarnermut inatsimmik allannguisinnaasutuaapput.

- Coronavirusip sunniutaanut sunniutigiumaagaanullu piffissaatillugu aaqqiissutissat piareersassallugit pisariaqarpoq, Illuatungeriit allapput. 

Inatsisartut upernaaru ataatsimiissanersut isumaqatigiinngissutaasoq

Inatsisartut upernaaru ataatsimiissanersut sivisuumik isumaqatigiinngissutaavoq. Kim Kielsen (S) taamaatitseqqusivoq - taannami isumaqarpoq ukiamut kinguartinneqassasoq.

Inatsisartulli siulittaasuata, Vivian Motzfeldtip (S), upernaaru ataatsimiinnissaq kissaatigaa. Tamannalu maajip ulluisa 17-ianniit pissasoq kissaatigaa, tamatumunilu malittarisassat innersuussutigalugit:

- Inatsisartut ataatsimiissanerlutik ataatsimiissannginnerlutilluunniit kisimik aalajangiisussatuaapput, Vivian Motzfeldt oqarpoq.