- Uanga ilisimassutitsissutigissavara illuatungiliuttut allallu qanoq oqalussimanerat taanna akuleruffigissanngilara, unneqqarillunga oqaatigissavara, isertuaatsumik nammineq qanoq isumaqarnera uanga nammineq gruppinni oqaatigigeersimagakku. Taamaammat isertuutissaqanngilanga.

Vivian Motzfeldt Kimimut tatiginnikkunnaarnissaq pillugu: Taamaammat isumaga allanngorpoq

Naalakkersuisut Kukkunersiuinermut ataatsimiititaliap Vivian Motzfeldtillu paasissutissanik tunniussisoqarnissaanik kissaataat akueraat.

- Isummanik allanngortitsinera, Naalakkersuisut ataatsimiitsitaliap piumasaanik naaperiaallutik oqariartuuteqarnerannik tunngaveqarpoq.

Inatsisartut siulittaasuat, Vivian Motzfeldt (Siumut) KNR-imut oqarpoq.

Inatsisartut suliaqarneranni sisamanngorneq ulloq takisoorujussuuvoq. Illuatungiliuttut naalakkersuisooqatigiillu akornanni Naalakkersuisut siulittaasuat, Kim Kielsen (Siumut) tassungalu tunngatillugu nipisattassiissutinut tunngasoq pillugu politikkikkut apeqqusersuisoqarpoq.

AAMMA ATUARUK Siumumit marluk Kielsenimut tatiginnikkunnaarnissamik taaseqataanngitsut

Oqallinnermi Inuit Ataqatigiit, Atassut, Suleqatigiissitsisut, Partii Nalerarlu tatiginnikkunnaarnermik oqaaseqarput. Siumumi ilaasortat marluk tassa Erik Jensen aamma Henrik Fleischer taaseqataanngillat.

Nipisattassiissutinut suliaq pillugu naatsumik:

 

Nipisattassiissut siorna aalisarneqanngitsut 204 tonsit 2020-mut nuutsinnissaat Naalakkersuisut maajip ulluisa aqqaneq-aappaanni aalajangerpaat.


Kalaallit Nunaanni Aalisarnermut Nakkutilliisoqarfiup paasissutisiinera naapertorlugu ammaasseqqinneq politikkikkut aalajangerneruvoq.


Imartani Paamiut avannaaniit Kangerlussuaq tikillugu nipisanniarusuttunut nipisanniartoqarsinnaajunnaartoq, sapaatit akunneranni kingullermi nalunaarutigineqaraluarpoq.

 

IA: Kim attuumassuteqarpallaarpa?

Inuit Ataqatigiit suliaq pillugu avammut nalunaaruteqaqqaarput.


Kim Kielsen umiatsiaminik aalisartumut atukkiussereerluni Naalakkersuisuni nipisattassiissutinik qaffaaqataagami imminut iluaqutissinnersoq pillugu apeqquteqarniarlutik nalunaaruteqaramik taamaattoqarpoq.
 

Kim Kielsen Naalakkersuisut ataatsimiinnerannut peqataavoq, attuumassuseqarsinnaallunilu paasissutissiissutiginagu.

 

Kukkunersiuinermut ataatsimiititaliaq sakkortuumik uparuaasoq

Inatsisartut Kukkunersiuinermut ataatsimiititaliaa tamatuma kingorna suliamut atatillugu nalunaajaanerminik tunniussaqarpoq.

 

Ataatsimiititaliallu matumani "sakkortuumik uparuaaneq" atorpaa pissutsillu "isornarluinnartutut" erseqqissaatigalugit.

 

- Ataatsimiititaliap sakkortuumik uparuaavoq Inatsisartullu Naalakkersuisut siulittaasuata suliami matumani attuumassuteqarpallaarnissamut apeqqut eqqumaffigisimanngikkaa malugeqqullugu.

 

Oqaaseqaatit taakku ataatsimiitaliap naliliinermi oqaaseqaataata allattorsimaffiani qaffasinnerpaamik sakkortunerpaamillu inissisimapput.

Kim Kielsenimulli tatiginnikkunnaartut ikinnerussuteqarput.

Vivianip piumasaqaataa eqquutsinneqartoq

Inatsisartut ataatsimiittarfianni sakkortuumik oqallittoqarneranut Kukkunersiuinermut ataatsimiititaliap suliamik misissuinerani allagaatinik Naalakkersuisunit tunniussaqartitserusunnerannik pissuteqarpoq.

Naalakkersuisut paasissutissanik tunniussisariaqartut Vivian Motzfeldtip sisamanngornermi oqallinnermi qasseeriarluni oqaatigaa.

Naalakkersuisut piumasaqaat tamanna naggaterpiaani akueraat. Tamannalu pillugu Vivian Motzfeldtip tatiginnikkunnaarnissamik taasisoqarnissaa akerlilerpaa.

- Unneqqarissumik isumaqarpunga una ersarissaatigissallugu pingaarnerpaajusoq, sulinermi uanilu qulequttami pingaarnerpaatut nammineq uanga isertuaatsumik sumi inissisimanera aamma Siumut-gruppiani ilisimassutitsissutigisarsimagakku. Inatsisartut tassaammata Naalakkersuisut sulinerannik nakkutilliisussat, nakkutilliissagunillu paasissutissat pisariaqartitatik taakku pingaanerpaatut pisinnaasariaqaraat Naalakkersuisoqarfinninngaanniit.

- Naggataatigullu taanna pivoq, Naalakkersuisut naaperiaanerat inersuarmi anngunneqarpoq, taamaalilluta suliassatsinnik alloriaqqissinnaangorsilluta.    

Oqallittoqannginnerani eqqumiitsumik ataatsimiittoqartoq

Naalakkersuisut ataatsimiititaliap kissaataanik akuersinissaat pingaaruteqarpoq. Illuatungiliuttummi oqarnerat naapertorlugu Siumumi ilaasortanut sisamanut Naalakkersuisut siulittaasuannik uppisitsinissaq isumaqatigiissutaareerpoq.

Illuatungiliuttut Kim Kielsenimik uppisitsiniarluni ataatsimiittoqarneraanerannut atatillugu Vivian Motzfeldt oqaaseqarnianngilaq.

- Uanga ilisimassutitsissutigissavara illuatungiliuttut allallu qanoq oqalussimanerat taanna akuleruffigissanngilara, unneqqarillunga oqaatigissavara, isertuaatsumik nammineq qanoq isumaqarnera uanga nammineq gruppinni oqaatigigeersimagakku. Taamaammat isertuutissaqanngilanga.

- Naaperiaanerlu pinngippat, uanga aamma soorunami Inatsisartutut pisinnaatitaaffikka taasisinnaanera ataqqineqartariartoq oqaatiginikuugakku.

Oqallinnermi immikkoortoq Siumut illuatungiliuttullu akornanni uissuummissutaasoq

Illuatungiliuttuni Partii Naleqqami Inuit Ataqatigiinnilu siulittaasut oqarnerat naapertorlugu Siumumi ilaasortat sisamat nipisattassiissutit pillugit oqallittoqannginneranni oqaloqatigisimavaat.

Partii Naleqqamit Hans Enoksen, Inuit Ataqatigiinnit Múte Borup Egede Siumumiillu Erik Jensen aamma Nikkulaat Jeremiassen sapaammi oktobarip ulluisa sisamaanni ataatsimiissimapput. Múte Borup Egedep Hans Enoksenillu oqarnerat naapertorlugu Siumumi ilaasortat marluk parteeqatitik sisamat pissaanermik nikisitserusuttut sinnerlugit peqataapput.

AAMMA ATUARUK Mystisk møde forud for debat om stenbidersagen

Siumumeersut marluk ataatsimiinnermi peqataanngitsut tassaapput Vivian Motzfeldt aamma Henrik Fleischer.

Hans Enoksenip oqarnera naapertorlugu Siumumi ilaasortat sisamat Kim Kielsen qatsullugu uppisikkusuppaat, tatiginnikkunnaarnermillu taasisoqarnerani taasinngiinnanngikkunik akerliuniarnatik.

Naalakkersuisut allagaatinik amigaataasunik ataatsimiititaliamut tunniussisimanersut Vivian Motzfeldtip ilisimanngilaa. Inatsisartulli nipisattassiissutinut tunngatillugu suliaq marlunngornermi oqallisigeqqissavaat, tassanilu partiit ilaannit suliamut atatillugu oqaaseqaateqarnissat amigaataapput.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat