Siulittaasoqarfik ammanerulernissamik ujartuivoq
![](/sites/default/files/styles/image_934x467/public/article_images/kuupik_ove_karl_630_1.jpg?itok=l9m6cUkw)
Siulittaasoqarfiummi aalajangerpaa Inatsisartunut ilaasortat aningaasatigut soqutigisatik pillugit namminneq piumassutsiminnik paasissutissiisalissasut.
Politikerit inuussutissarsiutinut namminneq soqutiginninnertik pillugu ammanerulernissaat misissuivigineqassasoq Kuupik Kleistip 2009-mi neriorsuutigaa, tamannalu akissutissarsiniarlugu Kukkunersiuinermut ataatsimiititaliap Kuupik Kleist pingasunngormat isumasioqatigaa.
Aatsitassanut naalakkersuisup, Ove Karl Berthelsenip, suliffeqarfimmi Kamma Aps-imi piginneqataanera KNR-ip apriilimi saqqummiummagu pisoq oqallisaaqqilerpoq.
Politikerit Inatsisartunut ilaasortaanermik saniatigut akissarsiaqarlutik saniatigut suliffeqarnerlutik, soorlu siulersuisunut ilaasortatut imaluunniit namminersortutut suliffiuteqarnerlutik, immersuinikkut akissapput. Nalunaarsugassaannut aamma ilaassapput ingerlatsivinnik 50.000 koruunit sinnerlugit nalilimmik ingerlataqarnerlutik, sulisitsisorisimasaminnilluunniit aningaasanik pisarnerlutik.
Inatsisartut siulittaasuat Josef Motzfeldt siullersaalluni immersuivoq, apeqqutit tallimat tamaasa naaggaarlugit.
Aaqqissuussineq atuutileqqammermat, ilaasortallu suliassami aalajangiinissamut periarfissaqartariaqarmata, paasissutissiissutit siulliit ukioq-manna juulip ulluisa aallaqaataata kingorna aatsaat saqqummiunneqarsinnaassasut Siulittaasoqarfik nalunaarpoq.