Angusarissaartareerluni: Polar Seafoodip coronavirusi ernumanartoqartikkaa
Ingerlatseqatigiiffik Polar Seafood 2018-imi 2019-imilu angusarissaarpoq.
2020-ili ingerlatseqatigiiffimmut qularnanngitsumik unamminartorpaaloqarlunilu nalorninartorpaaloqassaaq.
Polar Seafoodip tusagassiorfinnut nalunaarutaa naapertorlugu ingerlatseqatigiiffiup 2019-imi akileraannginnermi angusai 327 millionit koruunit pallippaat. Taakku 2018-imi kaaviiaartitaanit amerlanerulalarput.
Nammineq aningaasaatai 270 millionit koruunit missaannik amerligamik milliardit marlungajanngorput.
AAMMA ATUARUK KNAPK: Aalisartut coronap ajornartorsiortitsinerata nalaani aningaasatigut ikiorneqartariaqarput
Aningaasat taakku atorfissaqartinneqalersinnaapput. Tassami Polar Seafood unammillertimi Royal Greenlandip coronavirusip ajornartoortitsineranit maanna nalaataanut assingusumik assoralisimaalissasoq, sulifffeqarfiup naatsorsuutigaa.
Polar Seafoodimi siulersuisut siulittaasuata, Henrik Lethip, 2019-imisulli angusaqarluarnissartik siunniukkunnaaritsik oqaatigaa:
- Pissutsit nutaat naapertorlugit suliffeqarfiutitsinni nalimmassaanissarput tamaviaarupparput. Raajat, saattuat saarulliillu akikillipput, kilisaataatitsinnilu tunisassiorneq allanngortipparput allarpassuillu.
- Annaasaqarnissarput ingalassinnaanngilarput, ajornartoornerli sapinngisamik pitsaanerpaamik anigorniarsarivarput, Henrik Leth KNR-imut oqarpoq.
Massakkulli killiffik aatsaat ukiuni tulliuttuni ilorraap tungaanukariartuaarumaartoq, ingerlatseqatigiiffiup naatsorsuutigaa. Inuussutissanimmi nunarsuarmi tamangajammi niuerutit akililliartorput assartuinerlu unammillernarluni.
- Europami nunarpaaluit ammariartuaaqqikkaluartut pissutsit pisarnermissut ileqqikkiartuaarusaartussaassapput, Henrik Leth oqarpoq.