Sisimiut avannaanni nuna ikuallattoq

Sisimiut avannaani Kangerluarsuk Ungalliup qinnguata eqqaani nuna annertooq maanna ikuallappoq.

Danmarkimiit Nuummiillu upalungaarsimanermik sulisut aqagu pingasunngorpat ikiuukkiartussapput, ikuallannerli unnuaq nakkutigineqalerpoq.

Qeqqata Kommuniata pisortaanera Hans Christian Svärd taama paasissutissiivoq.

- Kangerluarsuk Ungallermi ajoraluartumik massakkut ikuallattoqarpoq, Hans Christian Svärd oqarpoq.

Ikuallanneq sapaatiummat siaruaakkiartulersoq, taanna paasissutissiivoq.

- Missingersuutit aallaavigalugit 2 kilometerit sanimut annertussuseqarpoq, qummullu ingerlaarluni. Taamaammat ikuallattoq annertuujuvoq.

Kangerluup qinnguani erngup nukinganik nukissiorfeqarmat, tamaani ikuallattoqalernissaa kommunimit ernummatigisimagitsik Hans Christian Svärd oqarpoq.

- Kisianni ullaaq manna upalungaarsimanermut pisortatta nalunaarutigivaa, nunap ikuallannera qujanartumik aqulerneqartoq. Tassa imaappoq, qamisaaneq massakkut ingerlanneqassaaq, sivisuumillu ingerlanneqassalluni.

Qamisaaneq immaqa sapaatit akunneranik suli sivisussuseqassasoq, Hans Christian Svärd nangilluni oqarpoq. 

Qatserisartut allat ikiuukkiartussasut

Anorlilissappat aamat siaruaannissaannik, taamaalillutillu ikuallatsitseqqilernissaannik pinngitsoortitsinissaq upalungaarsimasut suliassaannut ilaasoq, kommunip pisortaanera oqarpoq.

- Massakkut arfineq-marluk vagtikkaarlutik ulloq unnuarlu taakaniittarput. Kisianni qujanartumik Beredskabstyrelse, upalungaarsimanermut Danmarkimi immikkoortortaqarfik aammalu Nuumminngaanniit upalungaarsimanermut immikkoortortamit qamisaanerup ingerlatiinnaavinnissaanut ikiuukkiartorlutik aqagu tikissapput.

Ikuallannermut suna pissutaanersoq paasineqarsimasoq, Hans Christian Svärdip aamma paasissutissiissutigaa. 

- Mianersugaalliornermik aallaaveqarpoq, kommunip pisortaanera oqarpoq, annerusumillu oqaaseqarfigerusunnagu.

Asi maanna panertupilussuusoq, Qeqqata Kommunia facebookkimi quppernimi allappoq. Taamaammat inuit asimiitillutik ikuallatsitsisinnaasut mianersuutissagaat, kommunip pisortaata erseqqissaatigaa.

- Kaammattuutigeqqiinnassavara, innuttaasut eqqumaffigissagaat, sikarettit, ikittaatit arlaalluunniit igiinnannginnissaat, aammalu pujoorinermi ikumaartitsinermilu imermik piareersimatitaqarnissaq, innermillu atuinerup mianersuutigineqarnissaa.

Kommuni ikuallanneq pillugu facebookkikkut quppernermini allaaserisaqartassaaq.