Sisimiunut takornariartaatinik tikittoqannginnera sanaluttartunut annaasaqarfiungaatsiartoq
Umiarsuarnik takornariartaatinik Sisimiunut tikittoqanngitsoormat, 30 millionit koruunit missiliorlugit isertinngitsoorneqarput.
Eqqumiitsuliortut takornarianut tuniniaasartut isertitakinnerulerput.
- Tikinngitsoorput. Uagutsinnut malunnartorujussuuvoq tamatsinnut. Siornamut naleqqiullugu isertitakitsuararsuuvugut, ingasattumik isertitakippugut, eqqumiitsuliortoq Barse Svendsen oqarpoq.
Aamma taassuma eqqumiitsuliortartoqataa Jens Abrahamsen taama misigisaqarpoq.
- Malugeqaara assut, tunitsiviit ajornarsigamik, malunnartorujussuuvoq uagutsinnut.
Umiarsuarnut takornariartaatinut ilaallutik aasaanerani tikittartut sullivimmiittartut eqqumiitsuliaannik sanalugaannillu pisiortuulluartaraluartut, Jens Abrahamsen aamma oqarpoq.
Ukiorli manna allaaneruvoq.
Umiarsuit 40-t missaanniittut Sisimiunut ukiut tamaasa tikittaraluarput, coronavirusili nunarsuarmi ajornartoortitsimmat umiarsuarnik ukioq manna tikittoqanngilaq.
AAMMA ATUARUK Arctic Circle Business: Sisimiut corona pissutigalugu 30 millioninik iluanaaruteqanngitsoortoq
Taamaalillunilu illoqarfimmi 30 millionit koruunit missaanniittut isertinngitsoorneqartut, Arctic Circle Businessip misissuinerminit inerniliuppaa.
Misissuinerlu naapertorlugu takornariat ukiumut 3,5 – 4 millionillu koruunit akornanni eqqumiitsuliortut suliaannut misigisassarsiornermullu atortarpaat.
Eqqumiitsuliortulli sanalukkatik illoqarfiup avataanut nassiullugit suli isertitsissutigisarpaat. Kisianni ikinnerujussuarnik isertitaqartartut, Jens Abrahamsen oqarpoq.
- Naammattunnguanik pissaqartaratta ullormut ajunngilaq, kisianni siornatigornit ajornerujussuuvoq, Jens Abrahamsen oqarpoq.
Barse Svendsenilu umiarsuit pisisussanik ilaasullit tikinngikkaluartut suli sanaartorusaartarpoq.
- Ulapipilukkunnaarlunga uanga, maluginiarsimavakka soorlu sanaannguakka eqqissisimanerusumik suliarisalerlugit kusanarnerulaartunngorlugit, taamatut oqaatigalugu, eqqumiitsuliortoq Barse Svendsen oqarpoq.