Arctic Circle Business: Sisimiut corona pissutigalugu 30 millioninik iluanaaruteqanngitsoortoq
![](/sites/default/files/styles/image_934x467/public/article_images/krydstogt_sisimiut.jpg?itok=4ErSz5ma)
30 millionit koruunit.
Inuussutissarsiortut kattuffiata, Arctic Circle Businnessip Sisimiunit aasaq manna ilunaarutigineqanngitsoortutut nalilerpaa. Tamanna Sisimiunut umiarsuarnik takornariartaatinik tikittoqannginneranik pissuteqarpoq.
Umiarsuit takornariartaatit 44-t Sisimiunut siorna tikipput. Umiarsuarni 12.000-inik ilaasoqarpoq.
Coronali ukioq manna nunarsuarmut tamarmut ilungersunartorsiortitsivoq, umiarsuarnillu takornariartitsisarneq aasaq manna nalinginnaanngitsumik ilungersunarpoq.
- Takornariaqarnermik ingerlatsisunik qaminut suleqateqarpugut. Taakku isertitasaqanngillat. Sulisuminnik soraarsitsisariaqarsimapput, ilaasa aappaagu tungaanut qanoq inuusseqarnissartik ernummatigaat, ilaasalu qanoq allatut isaatitsisinnaanerlutik periarfissat eqqarsaatigilersimallunikkit, Louise Lynge Berthelsen Arctic Circle Businessimi pisortaq oqarpoq.
Ulluni tallimani mattusimasarnissaq
Umiarsuit takornariartaatit nunatsinnut tikikkunik ulluni tallimani mattusimaqqaassasut piumasaqaataasimallunilu – suli piumasaqaataavoq. Tamannalu umiarsuarnik takornariartunut tikikkaangamik akunnialuinnarni nunameeriarlutik aallaqqittartunut periarfissaanngilaq.
Arctic Circle Businessip Sisimiut umiarsuarnit takornariartaatinit qanoq ilunaaruteqartigisarneranik misissuinera naapertorlugu ukioq manna 30 millionit koruunit iluanaarutigineqanngitsoorput. Umiarsuillu ornerneranit isertitat illoqarfiup pingaartumik ilunaarutiginngitsoorpai.
AAMMA ATUARUK Piumasaqaatit nutaat takornariartaassuarnik takornariaqarnermut ajalusoortitseratartut
Misissuinermi Arctic Circle Businessip Sisimiuni takornariaqarnermik suliaqartut tamarmik siorna takornariaqarneranit qanoq ilunaartigisimanersut apeqquteqarfigai.
- Ilaasa umiarsuit takornariartaatit illoqarfigisatsinni annikitsumik isertitaqassutigisarigut oqaatigisarpaat. Kisianni takornariartaassuit orseriartoraangata tamanna illoqarfiup isertitaasa ilarujussuaniittarpoq, Louise Lynge Berthelsen oqarpoq.
26 millionit koruuninut kiffartuunneqartut
Sisimiunimi talittarfigissaarpoq, Arctic Circle Businessillu oqarnera naapertorlugu umiarsuit kiffartuunneqarnerminni 26-27 millionit koruuninik akiliissuteqartarput.
Takornariat takornarianut misigisassanut tammajuitsussanullu 3,5 millionit 4 millionillu akornanni iluanaaruteqartitsisarput.
Tassa imaappoq umiarsuarmi takornariartoq ataaseq agguaqatigiissillugu 312 koruuninik misigisassanut tammajuitsussanullu atugaqartarpoq, umiarsuarlu takornariartaat ataaseq agguaqatigiissillugu Sisimiuni talinngagaangami kiffartuussinermut 602.000 koruunit missaannik akiliissuteqartarluni.