Sisimiuni umiarsualiviup allinissaa oqaluuseraat
![](/sites/default/files/styles/image_934x467/public/article_images/containerklodser_630_0.jpg?itok=F-mwKy_y)
Kommunimi aningaasaqarnermut ataatsimiititaliap siunnersuutigaa, umiarsualivik 2012-imi 2013-imilu sananeqassasoq, 2013-imi aasaanerani uuliasiortoqarnissaanik neriuuteqarnernut piarersimaniassammat. Qeqqata Kommuniata nittartagaani tamanna allaaserineqarpoq.
Umiarsualiviup allilerneqarnissaa kommunip tassa kissaatigaa, suliffeqarfiit namminersortut Namminersorlutilluunniit Oqartussat peqataarusunngikkaluarpataluunniit.
Umiarsualiviup allilerneqarnissaanut aningaasartuutissat kommunimut akileraarutit 25 procentimiit 26 procentimut qaffannerisigut ilaatigut pissarsiarineqassapput.
Qeqqata Kommuniani borgmesteri, Hermann Berthelsen, ima oqarpoq:
- 2013-imi uuliasiortoqassagaluarpat taamaattoqassanngikkaluarpalluunniit, umiarsualiviup allilerneqarnissaa pisariaqarpoq. Sisimiuni Umiarsualivimmi pissutsit maannakkutut itsillugit, kilisaatit, umiarsuit tunitsiviit, umiarsuit takornariartaatit allallu umiarsualivimmi inissaqanngillat, taamaammat nunatsinni nunanilu allani umiarsualivissarsiortarput.
Umiarsualiviup allilerneqarnera Sisimiut ineriartornerannut iluaqutaassasoq, borgmesterip aamma neriuutigaa. Nangilluni ima oqarpoq:
- Umiarsuit angisuut Sisimiut Umiarsualiviannut tulassinnaasannginneri pissutigalugu suliffissaaleqisut amerliartoqaat, taamaammat umiarsualivimmi sanaartornissaq suliffeqartitsinissamut iluaqutaassagaluarpoq. Umiarsualiviup allilerneqarneratigut suliffissat amerlanerit pissarsiarissagivut neriuutigaara, suliffeqarfinnut akiliutit pisortatigullu ikiuutit taamaalilluta annikillisissinnaavavut, akileraarutillu qaffatsillugit. Akileraarutillu qaffatsinnerat sivikitsuinnaassasoq neriuutigaara.
Naalakkersuisut aamma Qeqqata Kommunia suleqatigiisitaliaqarput Sisimiuni umiarsualiviup allinissaanik misissuisumik.
- Suleqatigiit taakku suliartik qanittumi saqqummiuttussaavaat inassuteqaatissaallu pissangalluta utaqqivarput. Kisianni nuannerpoq kommuuni piumassutsimik takutitsimmat, Attaveqarnermut Naalakkersuisut Jens B. Frederiksen KNR-imut oqarpoq.
Suleqatigiissitap ilaatigut misissorpaa Sisimiut umiarsualiviat aktieselskab-inngortinneqassanersoq soorluttaa Nuup umiarsualivia taama pineqalersoq, imaluunniit suleqatigiinneq alla kommuunip Namminersorlutillu Oqartussat pilersissaneraat. Assartuussineq pillugu isumalioqatigiissitap siulittaasua Christen Sørensen Naalakkersuisut Qeqqata Kommuniatalu suleqatigiissitaanni siulittaasuuvoq.
Qeqqata Kommuniani kommunalbestyrelse aqagu tallimanngornermi oktobarip ulluisa 28-anni ataatsimiikkuni, aningaasaqarnermut ataatsimiititaliap Sisimiuni Umiarsualiviup allineqarnissaanik siunnersuutaa oqaluuserissavaat.