Sisimiuni Kangerlussuaq pillugu ingerlaqatigiittut
- Sisimiormiut nalunngilarput siunissarissaarluartoq taanna piviusunngorsinnaagaluarpat aqqusineq, mittarfissuaq pigiinnarlugu. Sooruku inuit allat politikerit aalajangiisartut tamanna paaserusunngikkaat, tupinnaqaaq, peqataasut ilaat, Tage D. Lennert.
Kangerlussuarmi Narsarsuarmi mittarfiit siunissami qanoq aalajangiiffigineqarnissaat Naalakkersuisunit suli pisortatigoortumik aalajangiiffigineqanngillat, taamaakkaluartorli nunaqarfinni periarfissanik misissuisussanik suleqatigiinnik marlunnik pilersitsipput.
Taamaammat ikumatitalisarlutik ingerlaaqatigiittut isummatik tusartinniaraat, aaqqissuisoq, Juliane Enoksen oqarpoq.
AAMMA ATUARUK Kangerlussuarmi mittarfiup takissusissaa suli nalorninartoq
- Ersarissumik suli oqartoqanngilaq. Taamaammat innuttaasugut pingaartittorujussuuvarput Kangerlussuaq aamma periarfissaanera massakkutut illuni, takornariaqarnikkullu inerisaaffigineqarluni ataannarnissaa taanna oqariartuutigivarput.
Qeqqata Kommuniani borgmesterip, Malik Berthelsenip nunatsinni attaveqatigiinnermi aaqqissuusseqqinneq aningaasatigut iluaqutissartaqarpat taperserpaa, nangillunili:
- Tapersersorsinnaanngisarali tassaavoq, takornariaqarnikkut Nunatsinni ingerlalluarnerpaat ilaat sulilu annertusiartortoq pilliutigalugu sumiiffinnik allanik ineriartortitsiniarneq. Taamaasiortoqassappata tamanna inuiaqatigiinnik ataatsimoornermik pilersitsinani avissaartuunnermik pilersitsissaaq, tamannalu inuiaqatigiinni minnerpaamilluunniit atorfissaqartinngilarput, borgmesteri oqarpoq.
AAMMA ATUARUK Naalakkersuisut Kangerlussuup siunissaa oqaaseqarfigerusunngikkaat
Kangerlussuarmi takornariaqarnermi ineriartortoqarnera Qeqqata Kommuniata aningaasaqarneranut taamaallat iluaqutissartaqanngitsoq ikumatitalisarlutik ingerlaaqatigiittut erseqqissaatigaat.
- Taannaaana, nunap karsianut iluaqutaasussaq takusinnaagatsigu illersortuaripput, imaanngitsoq Qeqqata kommunia kisiat pillugu, kisianni nuna tamakkerlugu aningaasarsiornikkut isaatitsiviusussaammat, Juliane Enoksen oqarpoq.
- Inuit avissaartuunnerat massakkut maani pivoq, tujorminarpoq ajoraluartumik taamatut pisoqarnera, Tage D. Lennert oqarpoq.
AAMMA ATUARUK Mittarfiit pillugit siunnersuut ataatsimiititalimut ingerlateqqinneqartoq
Sisimiuni issilluni qiianartukasiugaluartoq inuit 50-it sinnerlugit ikumatitalisarlutik ingerlaaqataapput.
Kangerlussuarmiut 70-it missaanniittut mittarfiup siunissaa ernummatigalugu isumartik ersersinniarlugu arfininngornermi ingerlaaqatigiipput.
Kangerlussuarmiut qanoq ittumik siunissaqarnersut, politikerit ersarissumik oqaatigisariaqaraat, akerliussutsimik takutitsisut oqariartuutigaat.
