Assi: KNR // Anton Gundersen Lihn

Naalakkersuisut Kangerlussuup siunissaa oqaaseqarfigerusunngikkaat

Simon Simonsenip, Vivian Motzfeldtip, taassumalu taartaata Aqqalu Jeremiassenip Kangerlussuup siunissaanut tunngatillugu USA-p qanoq inissisimanera oqaaseqarfigerusunngilaat.

USA-p Kangerlussuarmi mittarfimmik atuisinnaanerata Kangerlussuup siunissaanut qanoq sunniuteqartiginersoq Naalakkersuisunut ilaasortanut apeqqutigigaanni tamanna akissutissarsiffigineqarsinnaanngilaq.

Danmarkip, nunatta USA-llu akornanni isumaqatigiissut, USA-p sakkutuuinut Kangerlussuarmi Mittarfimmik atuisinnaatitsisoq KNR-ip sapaatit akunnerata siuliani allaaseraa. Isumaqatigiissut 1991-imi atsioqatigiissutigineqarpoq, Kangerlussuullu aaqqissugaanera malunnaatilimmik allanngortinneqassappat tamatuma USA-mut tusarniaassutigineqarnissaanik ilaatigut imaqarluni.

AAMMA ATUARUK Kangerlussuup mittarfiata siunissaa pillugu USA oqaasissaqartitaasoq

Ineqarnermulli Attaveqaqatigiinnermullu Naalakkersuisoqarfik Nunanut allanut Naalakkersuisoqarfimmut innersuussivoq, tassanngaanniillu ilisimatitsissutigineqarpoq nunanut allanut naalakkersuisutut atuukkunnaaqqammersoq Vivian Motzfeldt, taassumalu piffissami sivikitsuinnarmi taartigisaa Aqqalu Jeremiassen, suliaq pillugu apersorneqarsinnaanngitsut.

Nunanulli allanut naalakkersuisoqarfiup allakkatigut akissuteqarluni ilisimatitsissutigaa: ’1991-imi isumaqatigiissut atuuppoq. Isumaqatigiissutip atorunnaarsinneqarnissaa isumaqatigiinniutigeqqinneqarnissaaluunniit pilersaarutigineqanngilaq.’

Naalakkersuisoqarfillu KNR-imit apeqqutinut allanut akissuteqarumanngilaq, aamma allakkatigut.

USA-p mittarfiit qanoq aaqqissugaanissaat utaqqimaaraa

USA-mit siornatigut ilisimatitsissutigineqarpoq nunatsinni mittarfinnik tallilerinissamut anigaasalersueqataanissaq amerikamiut naalagaaffiata ammaffigigaa.

Paasissutissat KNR-imit pissarsiarineqartut naapertorlugit mittarfiit sumi qanorlu inissinneqarnissaannut USA piumasaqaatinik saqqummiussaqarsimanngilaq. Nunatsinni silaannakkut angallannerup siunissami qanoq aaqqissugaanissaanut Naalakkersuisut isummernissaat Amerikami naalakkersuisuisa utaqqimaarpaat.

AAMMA ATUARUK Suliffeqarnermi ilanngaat, mittarfissualiassat utoqqaallu illersuisuat

Mittarfiliortiternissaq pillugu inatsit Inatsisartuni oktobarip 15-iani 22-anilu oqaluuserineqartussaavoq. Tamatumanilu Nuummi, Ilulissani Qaqortumilu mittarfiit nutaat pineqarput - Kangerlussuaq ilaatinneqarani.

Siumup, Atassutip Nunattalu Qitornaasa naalakkersuisooqatigiinnissamik isumaqatigiissutaat nutaaq naapertorlugu Kangerlussup siunissaa silaannarmi erfattutut suli ippoq:

”Kangerlussuup  Narsarsuullu  siunissaat  pillugit  kommunit  peqatigalugit  aalajangiisoqassaaq,  tassungalu atatillugu namminersorlutik inuussutissarsiuteqartut suliassanik tigusisinnaanerat ammaffigineqassalluni,” naalakkersuisooqatigiinnissamik isumaqatigiissummi tamanna atuarneqarsinnaavoq.

AAMMA ATUARUK Kinap mittarfiliortiternermut soqutiginninnera ministerip erseqqissumik oqaaseqarfiginngikkaa

 

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat