Kangerlussuarmi mittarfiup takissusissaa suli nalorninartoq
Naalakkersuisut marlunngornermi tusagassiuutinut nalunaaruteqarneranni mittarfiup minnerpaamik 1500 meteriunissaa paasinarsigaluarpoq. Tamatumali piviusoq assiginngilaa.
Mittarfiup takissusivissaanut atatillugu inaarutaasumik suli aalajangiisoqanngitsoq, Simon Simonsenip nutaamik nalunaaruteqarnermini paasissutissiissutigaa, imalu allappoq:
- Inatsisartut Qaqortumi, Nuummi aamma Ilulissani mittarfinnik sanaartornissaq pillugu inatsisissatut siunnersuummut saqqummiunneqartumut isummereerpata, Naalakkersuisut kommunit suleqatigalugit siunissami Narsarsuarmi aamma Kangerlussuarmi pisariaqartitsinernik qulaajaanissaat pisussanngussaaq.
AAMMA ATUARUK Kangerlussuarmi mittarfiup minnerpaamik 1500 meteriunissaa Naalakkersuisut siunniukkaat
Kangerlussuarmili innuttaasut mittarfiup qumiguulinnut mittarfinngortinneqaratarnissaanut ernumassanngillat, Kim Kielsenimmi Kangerlussuup qulimiguulinnut mittarfinngortinneqannginnissaa qineqqusaarnerup nalaani oqaatigaa, tamannalu Naalakkersuisut pisortatigoortumik politikkeraat, Naalakkersuisut KNR-imut ilisimatitsipput.
Narsarsuup siunissaanut tunngatillugu suli nalorninartoqarpoq.
Mittarfinnut pilersaarut sisamanngornermi novembarip aallaqqaataanni aappassaaneerneqassaaq novembarillu 15-ianni pingajussaaneerneqassalluni.
