Sisimiuni atuarfik nutarterneqartoq piareerluinnalerpaat

Atuarfiup pisortaata Nivi Heilmannip atuarfiup ilusaa iluarisimaarpaa.

- Nutaaliaavoq atortutigut. Silaannarinneroqaaq assut taanna malunnartorujussuuvoq soorunami, pinnga atuarfitoqannguarput ukiuni 65-ini napanikoq aserfallallunilu silaannalunnikooqigami.  

Minngortunnguup atuarfiani pisortaq Nivi Heilmann taamatut oqarpoq.

Aamma atuaruk Atuartup ipad atornerorusuppaa

Taanna oqaluttuarpoq, klassit ataasiakkaat inaat nalinginnaasuusut, aammali nutaamik gruppikkaarluni suliffissanik ineeraqartoq, kiisalu klassit inaasa ilaat katitinneqarsinnaasut inersuaaranngortillugit.

Atuarfimmi init tamarmik nutaalianik atortulersugaapput, assersuutigalugu allattarfissuarnik whiteboardeqarlutik, aammalu seqersittakkamik saqqummiiveqarlutik. Aningaasanik sipaarniuteqarneq pissutaalluni ineeqqat ilaannaat nutaarluinnarnik pequteqarput.

Atuarfittaaq ataatsimoornarnerusoq

Angajoqqaajusut assut atuarfiup nutarternera iluarilluaqaat.

 - Massakkut atuarfittaaq ataatsimoorneruvoq, siornatigut avissaaqqaasappoq immikkoortukkaartorujussuulluni atuarfitoqaagamimi. Sukkut tamaana ilallattaarnikuulluni massakkullu ataatsimoorfiunerujussuulluni aamma qularinngilara atuarfik ingerlallualerpat inissilluariarpata assut ataatsimoorfiulluassasoq.

Atuarfiup siulersuisuini ilaasortaq Vivian Johansen taamatut oqarpoq. Taannalu  neriuppoq  meeqqat atuarfitsik paarilluassagaat ataqqillugulu.

Minngortunnguup atuarfia pisortatigoortumik februaarip 13-iani ammarnersiorneqassaaq.