Sisimiuni annaassiniarneq: Aalisariat putsilernerani periarfeerunneqartut
Aliikkutaralugu aalisariartut marluk qulimiguulik atorlugu Sisimiut avannaanni ujaasisoqarnerani ajunngitsut nassaarineqarput. Kalaallit Nunaanni Politiit pigaartuisa pisortaat Jeppe Andsager KNR-imut taama ilisimatitsivoq.
Annaanneqartut tassaapput angut 56-inik ukiulik Italiameersoq, angullu 71-inik ukiulik Tuluit Nunaanneersoq. Taakku arfininngornerup naalerneraniilli maqaasineqarput. Taakku ajunngitsut sapaammi ullaap tungaani nalunaaqutaq qulit qaangeraa tanneq sisamat missaanni nassaarineqarput.
Takornarniat katillugit arfinillit Sisimiunit avannamut 30 kilometerit missaanni ungasitsigisumi niutinneqarsimapput, ujaarineqartullu marluk taakkununnga ilaasimallutik. Takornarniat kuuk sinerlugu ingerlasimapput, naallu tamarmik sumiiffimmi tassani aalisaqatigiikkaluarlutik arfinillit akornanni sisamaannaat aaneqarfissaminnut isumaqatigiissutigineqartumut anngussimapput. Politiit pigaartuisa pisortaat taama oqaluttuarpoq.
Politiit annaassiniartartullu angutit maqaasineqartut pillugit nalunaarut unnuaq nalunaaqutaq pingasut missaanni tiguaat. Takornarniat sinneri sisamat angutit marluk akunnialunni ujaarereeraallu politiit annaassiniartartullu kalerrinneqarput.
Aliikkutaralugu aalisartut marluk taakku aaneqarfissaminnukarlutik tammarsimasut politiit pigaartuisa pisortaata nalilerpaa:
- Kuuk aalisarfigisassaat ungasissumiippoq, 600-700 meteritullu imminnut ungasitsigalutik aalisarsimallutik, aallartiffiulli nalaanukartariaqarsimapput, putsilerneranili tammartoorlutik, Jeppe Andsager KNR-imut oqarpoq.
Timmisartoq, qulimiguulik politiillu angallataat ujaaseqataasut, Kalaallit Nunaanni Politiit ilisimatitsissutigaat, soorlu aamma takornarniartitsisut angallataat aamma ujaaseqataasoq. Aalisariat marluk ujaarineqartut qulimiguulimmit naggataatigut nassaarineqarput.
- Ajunngitsut nassaarineqarput, umiatsiamullu namminneq ingerlasinnaasimallutik. Tassa qulimiguulimmik angallanneqanngillat, politiit pigaartuisa pisortaat oqarpoq.
Ujaarineqartut kinaassusaat maanna uppernarsarneqassaaq killisiorneqassallutillu. Qanoq pisoqarsimanera apeqqutaalluni aliikkutaralugu aalisariat taakku ujaasisoqarneranut atatillugu akiliisitaaratarsinnaapput.
