VIDEO Sisimiuni aalisartut Krusep naalakkersuisoqarfia utaqqisariaqarpaat

Aalisartut Sisimiunilu innuttaasut saarullittaminnut tunitsivissaqannginnertik ajoralugu sisamanngormat ingerlaaqatigiipput, aalisarnermulli naalaakkersuisup aaqqiiniarluni siunnersuutaa Naalakkersuisunit itigartinneqarpoq.

Leif Fontaine Sisimiuni Aalisartut Piniartullu Peqatigiiffianeersoq ingerlaartuni sallersaalluni megafonikkut oqariartuutit nilliagai tunuani aalisartut allagartarsualerlutik ingerlaarput.

- Angallatigut, umiatsiaaqqagut, talittarfimmi talinngaannarsinnaanngillat, Fontaine ilaatigut nilliavoq, illoqarfimmilu innuttaasut arlallit aamma tapersersuipput.

- Aalisarneq illoqarfitsinni uummataagami. Aningaasarsiorneq tassanngaanniit aallaaveqarmat. Aammalu aalisartut massakkut ajornartorsiornerannut tapersersorusukkakkit, Arnold Absalonsen sooq peqataanini KNR-imut nassuiaatigaa.

Kommunip allaffiata silataani Qeqqata Kommuniata borgmesteria Hermann Berthelsen naapippaat, taassumalu aalisartut tapersersorpai.

- Piumasarigipput, kissaatigigipput, piaarnerpaamik tunitsiveqarnikkut pissutsit Sisimiuni iluarsisariaqartut, megafonilerluni oqalugiarnermini ilaatigut taama oqarpoq.

Aamma atuaruk Aalisartut kissaataat naalakkersuisunit itigartinneqarpoq

Umiarsuarlu tunitsivissaagaluaq talittarfimmi uninngaannarpoq, sulimi akuerineqarsimanngilaq. Naalakkersuisullu sisamanngormat aalisarnermut naalakkersuisup Karl Kristian Krusep tunitsivinnik akuersisarnerup allanngortinnissaanut siunnersuutaa itigatippaat.

- Massakkut periusaasup allanngortinniarneqarneranut tunngatillugu Naalakkersuisut iluarsiissutissamik kissaateqarput, taakkualu massakkut naalakkersuisoqarfimmi suliaqarnerit ingerlapput.

Aamma atuaruk Sisimiuni aalisartut tunitsiviliisoqarnissaanik ilungersuuteqartut

- Neriunnikuugaluaratta ullumikkut naammassissagipput, kisianni uagutsinnut uteqqippoq, Karl Kristian Kruse oqarpoq.

Krusep naalakkersuisoqarfianit siunnersuut suliareqqitaq Naalakkersuisut suilittaasuta naalakkersuisoqarfianut nassiunneqassaaq, aalisarnermulli naalakkersuisup siunnersuut qaqugu akuerineqassanersoq oqaatigisinnaanngilaa.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat