VIDEO Sisimiormiut aalisartut Krusemut erseqqissimik oqariartuuteqartut
Qulequttat nassuiaasersorluakkat arfineq pingasut Sisimiuni aalisartut piniartullu peqatigiiffiata aalisarnermut piniarnermullu naalakkersuisumut oqaloqatigiissutiginiarlugit allattoreersimavaat, oqaloqatigiissutissaaleqinngeqaammi.
- Tassa soorunami kissaatiginarnerpaavoq aalisarnikkut periarfissat pitsanngorsarnissaat naalakkersuinikkut suleqataaffigineqassasoq, Sisimiuni aalisartut piniartullu peqatigiini siulersuisuini ilaasortaq, Leif Fontaine oqarpoq.
Nipisanniarneq, avataani qaleralinniarneq saarullinniarnerlu, assagiarsunniarneq tunitsivissaqarniarnerlu, oqaloqatigiissutigiumaneqartut ilaannaminiinnannguaraat.
- Killiffigisaminni anigorusutamittut oqariartuutaat ersaripput. Taakku tusarnaareerlugit aammalu naalakkersuinikkut suliagut pillugit alloriartitsinissami suliat ingerlanerat isumaqarpunga ajunngitsumik alloriarfissaqarsinnaaneranik kinguneqassassoq maani oqaloqatigiinnerput, aalisarnermut piniarnermullu naalakkersuisoq Karl-Kristian Kruse oqarpoq.
Ataatsimeeqatigiinneq eqqissisimasumik akaareqatigiillunilu ingerlanneqaraluartoq, pissutsit naammaginngisat sakkortunerulaartumik oqaatigineqarnissaannut inissaqartinneqarput.
- Kukkunerit annersaat, tassalu makku ataatsimiitsitaliarsuit kusanartut sanaavi, eqqarsaatiginiarisigit, peqataasup ilaata oqaatigaa.
- Tassa politikkikkut sulissagaanni imaannaanngitsut aammalu suliassat assigiinngitsut tigummineqarsinnaanerat siumut eqqumaffigisassaasarput, taamaammat tupiginngilara allamiitilluta – aamma maani – killiffimmi imaannaanngitsumik atugaqarsimanerminnut tunngatillugu sakkortulaarsinnaasunilluunniit oqaloqatigiinnerit ingerlanerat, inissaminiiginnarpoq, Karl-Kristian Kruse oqarpoq.
Naapeqatigiinnerlu ajunngitsumik kinguneqarpoq.
- Pingaartissimavarput aalisarnikkut periarfissat massakkut ineriartorteqqinnissaannut oqariartuuteqarnissaq, taannalu isumaqarpunga tusaalluarneqartoq, Leif Fontaine naggasiivoq.
