Sinerissap assilersorneqarnera 2041-mut ingerlaannassasoq
Nunatta imartaani – pingaartumik kitaata sineriaani amerlasuut – sumut ingerlaarnertik ilisimavallaartanngilaat. Imartattami assingi pisoqaangaatsiarput.
Kisianni ineqarnermut attaveqaasersuutinullu naalakkersuisup, Hans Peter Poulsenip aamma Danmarkimi silap pissusianut pilersuinermullu ministerip, Lars Aagaardip akornanni Nuummi ullumi isumaqatigiissuteqartoqarpoq.
Ineqarnermut attaveqaasersuutinullu naalakkersuisoqarfik tusagassiuutinut nalunaarummi allappoq.
Isumaqatigiissutip nunatta imartaata assinginik 2041-mut suliaqaannarnissaq nutarterinissarlu qulakkeerpai.
- Immap assiliortarnermi naligiimmik atugassaqartitsinissaq anguniarlugu, ilutigisaanillu Kalaallit Nunaata ineriartornerani pisariaqartumik eqaassuseqarnissaq inissaqartillugu pitsaasumik isumaqatigiissuteqaratta nuannaarutigaara, ineqarnermut attaveqaasersuutinullu naalakkersuisoq, Hans Peter Poulsen oqarpoq.
Isumaqatigiissut qaangiuttussanngoraluartoq
Oqaatigeriikkatsitut nunatta sineriaata imartaata assiliartalersornerata ukiuni arlalinni amigaataanera ajornartorsiutaasimavoq.
Danmarkip nunattalu akornanni isumaqatigiissutaareersoq – assit tamarmik suli nutarterneqanngitsut digitalinngortinneqanngitsullu 2026-mi qaangiuttussaagaluarpoq.
Taamaammat Hans Peter Poulsenip ullumikkut isumaqatigiissuteqarsinnaanertik aamma nuannaarutigaa:
- Suliassaqarfimmi matumani Naalakkersuisut, Danmarkimilu naalakkersuisut akornanni nukittunerusumik suleqatigiinnissaq qilanaaraara, Hans Peter Poulsen oqarpoq.
Immap assingi imaatigut angallannermut qulakkeerisut
Nunatta imartaani angallannerup ajornaannerunissaa aamma nunatta eqqaani imaani qajannartoqarajummat isumannaannerusumik aqquteqarnissaanut assiliartalersuisoqarnissaa 2009-imi avatangiisinut ministeriusup, Troels Lund Poulsenip aalajangerpaa.
Taamaammat nunatta imartaata assinginik 74-inik digitalikkut suliaqartoqarnissaa pillugu danskit naalagaaffiata aamma namminersorlutik oqartussat akornanni isumaqatigiissuteqartoqarpoq. Tassanili nunatta kujataa-kippasissuani najugaqartoqarfiunerpaasumi kisimi.
Immap assingi 2018-imi piareersimanissaat pilersaarutaagaluarpoq, Danmarkimili naalagaaffiup suliffeqarfiini nutsertoqarnera pissutigalugu suliaqarneq unittoorpoq, naammassineqarnissaalu 2026-mut kinguartinneqarluni.
Taamaammat suliaqarnerup ingerlatiinnarneqarnissaa aamma pingaaruteqarpoq. Tamanna ministerip tusagassiuutinut nalunaarummi aamma erseqqissaatigaa:
- Imaani angallannermi isumannaallisaaneq pineqartillugu immap assingi pingaaruteqarluinnarput, kisianni aamma Kalaallit Nunaanni attaveqaasersuutit allilissatillugit, inuussutissarsiutinulluunniit nutaanut aningaasaliisoqassatillugu pisariaqarluinnarlutik. Lars Aagaard oqarpoq, nangillunilu:
- Tamanna pillugu Naalakkersuisunik suleqateqarnerput ullumikkut nukittorsarsinnaagatsigu, nutaanillu immap assiliortarneq ingerlatiinnarsinnaagatsigu nuannaarutigaara, Danmarkimi silap pissusiani aamma pilersuinermut ministeri tusagassiuutinut nalunaarummi naggasiivoq.
