Simon Olsen toquvoq
Sisimiut borgmestererisimasaa Naalakkersuisunilu ilaasortaasimasoq, Simon Olsen arfininngormat toqukkut qimaguttoq pillugu, Naalakkersuisut siulittaasuat Aleqa Hammond ilaatigut ima eqqaaniaanermini allappoq.
Allattoq Carla Davidsen
juunip 11-at 2013 07:32
Simon Olsen angutaavoq nukittooq inuit tamatta sumiikkutta ajunngitsumik atugaqarnissatsinnik pingaartitsisoq, inuillu tamatta ataatsimoornissatsinnik ilungersuuteqartuartoq.
Simon Olsen inuugallarami qiimmassaajuartuusimavoq, allaat naalakkersuinikkut sulinitsinni erloqinarsinnaasartut suliarinerini suliassanik oqinnerulersitsisumik sunniuteqartarluni.
Simon Olsenip toqukkut qimagunneratigut, angummik imaannaanngitsumik nukittuumillu Siumumi inuiaqatigiinnilu annaasaqarpugut.
Naalakkersuisut siulittaasuat, Aleqa Hammond taama ilaatigut eqqaaniaanermini ualeq manna allappoq.
