USA-mi qinersineq 2016 Simon Lynge: Inuit nanertisimarrapput

USA-milu præsidentimut ullumi marlunngornermi qinersisoqarnissaanut allatulli pissangavoq. Port Townsendimimi innuttaasut amerlanersaat demokratiupput.

- Inuit nanertisimarrapput, qanoq pisoqaratarsinnaanera ernummatigaat. Inunnik naapitaqarnissaq ilaatigut eqqumiilaartarsinnaavoq, allatummi isummallit maluginiarnarnerulersimapput. Inuit oqallisingaatsiartalersimapput, assortuutilertarlutik. Republikanerimmi qinigassanngortitaata pissutsit allanngortilluinnarsimavai, inuit avissaartuutsilersillugit, naak isumaat immaqa assigiissuteqartorujussuusinnaagunaraluartut. Issiaqatigiissinnaajunnaarsimappulluunniit, naak tamat oqartussaaqataanerat eqqarsaatigalugu tamanna immaqa pingaarnerpaajugaluartoq.

Assortuuttoqartariaqanngilaq, inuit allat isumaat ataqqillugit oqaloqatigiittoqarsinnaasariaqaraluarpoq, Simon Lynge oqarpoq.

Qineqqusaarneq sakkortooq

Innuttaasulli akornanni kingullermik qinersisoqarneranut sanilliullugu avissaartuuttoqarnerulersimanera Simon Lyngep tupaallaatigaa:

- Oqaatsit sakkortusinnaasarput. Hillary Clinton ajugaassappat silarsuaq aserussasoq, USA-milu peqquserluttuliornerit amerleriaannassasut republikanerit isumaqarput, taamatullumi aamma demokratit. Taakku isumaqarput Donald Trump ajugaassagaluarpat silarsuaq aserussasoq. Tamanna ajuusaarutigaara. Kinaluunniillu ajugaassappat oqaloqatigiissinnaasoqartariaqartoq isumaqarpunga, qinersinerup kingorna tamanna suliassarujussuuvoq, Simon Lynge oqarpoq.

Naallu maanna qinersineq avissaartuutsitsilersimagaluaqisoq taanna isumalluarpoq.

- Qinersineq qanorluunniit inerneqarpat silarsuaq aserornavianngilaq. Naak isumaqataajuaannarneq ajoraluartunga inuk pitsaasuusoq isumaqartarpunga. Inoqarpoq ssakkortuunik isummallit, taakkuli aamma inissaqartariaqarput. Taamaammat pissutsit pitsaanerulernissaat qularutiginngilara, Simon Lynge oqarpoq.