Silap pissusiata allanngoriartornerata akiorniarnissaanik ilungersuutillit Norgemi naalagaaffik eqqartuussivilersuukkaat
Norgep uuliasiorunnaarnissaanik gassimillu qalluiunnaarnissaanik piumasaqarlutik, silap pissusiata allanngoriartornerata akiorniarnissaanik ilungersuutillit Norgep illoqarfiisa pingaarnersaanni Oslomi eqqartuussivitsigut marlunngornermi suliassanngortitsipput.
Nordsømi uuliasiorfiit nutaat Tyrvingip, Breidablikkip Yggdrasilillu uuliasiorfiusinnaanissaannut Norgemi naalakkersuisut akuersissutaasa atorunnaarsinneqarnissaat, silap pissusia pillugu ilungersuutillit eqqartuussivitsigut aalajangiiffigisussanngortinniarpaat.
Norgemi nutaarsiassaqartitsivik NTB taama allappoq.
Uuliasiorfiit nutaat allilerneqarnissaannut pilersaarutit eqqartuussivitsigut suliap ingerlanerani unitsikkallarneqarnissaat, avatangiisinut suliniaqatigiiffiit Greenpeacep Natur og Ungdomillu piumasaraat.
Eqqartuussivitsigut suliap pingasunngornermi decembarip ulluisa arfernata tungaanut ingerlanissaa ilimagineqarpoq.
Uuliasiorsinnaanissamut akuersissutit inatsisinik unioqqutitsinerunngitsut, Norgep uuliasiornermut nukissiuuteqarnermullu ministereqarfia isumaqarpoq.
Norgemi naalagaaffik eqqartuussivitsigut suliamik assingusumik 2020-mi eqqartuussivilersuunneqarmat pinngitsuutinneqarpoq.
