Norgep uuliasiorneq pillugu eqqartuussivilersuunnera suliareqqitassanngortikkaat
Eqqartuussivimmut suliassanngortitsisimasut Greenpeacep, avatangiisinik illersuiniaqatigiiffiup Natur & Ungdomip kiisalu Bedsteforældrenes Klimaaktionip tamanna uppernarsarpaat.
Suliniaqatigiiffiit pingasuusut suliap ingerlanneqarnerani aningaasartuutinik 450.000 koruunit missaanniittunik Oslomi januaarip qaammataani akiliisussanngortinneqarput. Silap pissusianut tunngatillugu eqqartuussivinnut suliassanngortitsinerit Norgemi siullersaraat.
Avatangiisinik illersuiniaqatigiiffiit isumaqarput Norgep naalagaaffiata Barentsip imartaani immikkoortuni mianerisassani uuliasiorfissanik tunniussisimanera inatsimmi tunngaviusumi paragraf 112-imik unioqqutitsinerusoq.
Paragrafimi tassani ilaatigut aalajangersarneqarmat kikkulluunniit avatangiisit peqqinnartut pisinnaatitaaffigigaat.
AAMMA ATUARUK Norgep naalagaaffia uuliasiornermut tunngatillugu eqqartuussivimmut suliassanngortinneqartoq
Norgemi naalakkersuisut Barentsip imartaata kujataata kangisissortaani uuliasiorluni qillerisoqarnissaanut maajimi 2016-imi akuersissuteqarput.
Norgep nunani suliffissuaqarfiusuni siullersaalluni Naalagaaffiit Peqatigiit silap pissusia pillugu Parisimi isumaqatigiissutaannik atortussanngortitsineranit ullut qulit qaangiutiinnartut taama pisoqarpoq.
Greenpeacep Norgemi immikkoortortaqarfiani pisortap Truls Gulowsenip suliareqqitassanngortitsinissamik aalajangerneq ima oqaaseqarfigaa:
- Issittumi sumiiffiit siornatigut suliaqarfigineqarsimanngitsut ammaannerisigut Norgep CO2-mik aniatitsinini nunap killeqarfiata avataanut nuuppaa silallu pissusiata allanngoriartornera uatsinnut allanullu tamanut akornutaasoq sakkortusarlugu.
/ritzau/NTB