Danskit ministeriat: Silap pissusia pillugu ataatsimeersuarnissamut kalaallit siunnersuuteqarnissaat ammaffigigaa
Kalaallit inuiaqatigiit oqartussaaffigaat. Kalaallit Nunaata nammineq aalajangissavaa klima pillugu isumaqatigiissummut ilaassanerluni imaluunniit naamik. Dansit tungaanniit taanna ataqqivarput.
FN-ip klima pillugu ataatsimeersuarnerani danskit allat peqatigalugit sapaatip akunnerani uani Bonniliassaaq. Tassani Parisimi isumaqatigiissummi immikkoortortat - nunarsuup kiatsikkiartorneranik unititsisussat oqallisigineqassapput.
AAMMA ATUARUK Silap pissusia pillugu ataatsimeersuarneq Bonnimi ataasinngornermi aallartippoq
Isumaqatigiissummulli Kalaallit Nunaat ilaanngilaq. Namminersorlutillu Oqartussat Bonnimut ataatsimiigiartitsisimanngillat.
Tamanna ICC-p siulittaasorisimasaanit Aqqaluk Lyngemit isornartorsiorneqarpoq. Danskilli klimamut ministeriat ima oqarpoq:
- Nunarsuarmi angalatillunga Kalaallit Nunaat ataqqineqartarpoq, ilisimaneqarporlu silap pissusaata allanngoriartornerani unammillernartorpassuarnik peqartoq. Kalaallit Nunaalli peqataanngikkaluarluni isumaqatigiinniarnernut kissaateqassappat ammaffigaarput, Lars Chr. Lilleholt taama oqarpoq.
AAMMA ATUARUK Nunatta ataatsimeersuarnermi ilaannginnera isornarpoq
Kalaallit politikerii attaveqarfigillattaajuaannarpavut, klimalu pillugu Bonnimi ataatsimeersuarnermut isumassatsialaqarpata tusaanissaannut ammavugut, ministeri oqarpoq.