Silap pissusaa pillugu ministeri kissarnersiuivoq

Qallunaat silap pissusaa pillugu ministeriat Martin Lidegaard nunatta kujasinnerusortaani Jens B. Frederiksenilu angalareerlutik ullumi marlunngornermi Nuummut tikissapput. Taakku kujataaniinnerminni DMI-p Narsarsuarmi sikunik alapernaarsuiffia takornarniarpaat, Ikerasassuarmi silasiorfik takornarniarneqarsimalluni kiisalu suliniut PROMICE sermersuup allannguutaanik uuttuinermik suliaqarfiusoq takornarniarsimalluni.
aggustip 14-at 2012 08:57

Politikerit taakku marluk Ilimmarfimmi aqagu pingasunngornermi tamanut ammasumik ataatsimiisitsippata ilisimatuut isummersortartullu nunatsinneersut silap pissusaata allanngoriartornerata inuiaqatigiinnut kingunerisassai suunersut oqaluuserissavaat.

Ataatsimeersuarneq ullaap tungaani qulingiluanut Ilimmarfimmi aallartippat silap pissusaata allanngoriartornera pillugu ilinniutit nutaat nunatsinneersut tusarnaarianut saqqummiunneqassapput.

Ilinniutit nutaat taakku Issittumi Siunnersuisoqatigiit silap pissusaa pillugu misissuititaasa SWIPA-meersut suliaraat, taakkulu misissuisimanerisa inernerini aqagu saqqummiunneqassallutik.

SWIPA tuluttuumiit naalisagaavoq tassaallutillu Snow, Water, Ice and Permafrost in Arctic - kalaallisuunngorlugu issittumi aput, imeq, siku nunalu qeriuaannartumik nutsersinnaasarput.

Aamma tamanut ammasumik ataatsimiisitsineq iluatsillugu Martin Lidegaard aamma Jens B. Frederiksen atsioqatigiissuteqassapput, atsioqatigiissutissaallu tassaavoq suleqatigiinnissamik isumaqatigiissut anguniagaqarpalaartoq, taassumalu kingunerisaanik nunani tamalaani silap pissusaa pillugu isumaqatigiinniartoqalersillugu Nunatta akuunerusalernissaanik imaqarpoq.

Tamatuma saniatigut pinngortitamik- avatangiisinillu illersuiniaqatigiit AVATAQ-meersut kiisalu Pinngortitaleriffimmeersut saqqummiussissapput, tassanilu silap pissusaata allanngoriartornerata kingunerisinnaasaanik isummersuutitik saqqummiussuutissavaat.

Innuttaasunik ataatsimiisitsineq aqagu pingasunngornermi nalunaaqutaq qulingiluaniit Ilimmarfimmi aallartissaaq.