Grønlandsbankenip pisortaa: Silap allanngoriartorneranut akiuuteqataanngikkutta eqqumiissaqaaq
Silap allanngoriartornera pillugu Parisimi isumaqatigiissummut nunatta ilanngussinnaanissaanut apeqqut Inatsisartuni kingumut kinguartinneqaqqippoq, siusinnerpaamillu ukiamut aatsaat oqaluuserineqassaaq ilumut nunarput Naalagaaffiit Peqatigiivisa silap allanngoriartornera pillugu anguniagaanut ilanngutissanersoq.
Inatsisartut oqaluuserisamut pingaarutilimmut kinguartitsinerat Grønlandsbankenip pisortaata Martin Kviesgaardip uggoraa, taannami isumaqarami politikerit silap allanngoriartornera pillugu iliuuseqarnissaat pingaaruteqarluinnartuusoq:
- Kalaallit Nunaata Parisimi isumaqatigiissummut ilaanissaa pingaartuusoraarput, taamaammallu Inatsisartuni sukkasuumik suligasuartoqarnissaa pingaartuuvoq. Ilami eqqumiissaqaaq Kalaallit Nunaat silap allanngoriartorneranit eqqorneqarnerpaanut ilaasussaq ikiuunnianngippat.
Sulisitsisuni pisortaq Christian Keldsen aamma oqarpoq apeqqummut taama angitigisumut iliuuseqartoqartariaqalersoq, taannali isumalluarneruvoq.
- Neriuppugut Parisimi isumaqatigiissummut periarfissat kingunerusinnaasullu ilanngunnissaminnut paasereersimassagaat. Nalunaarusiarujussuaq takisooq marsip aallartinneranili saqqummiunneqareerpoq, taannalu assigiinngitsukkaanik sammivilinnik allagaavoq, ilaatigut aningaasaqarnerup tungaatigut sammilivimmik aamma, taanna oqarpoq.
Soqutaanngitsutut isigisassaanngilaq
Taanna erseqqissaavoq, Kalaallit Nunaata minguitsumik nukissiuteqarnissamik pilersuileriartuaarnissaa matumani aalajangiisuujumaartoq – qanorli iliorluni ineriartortitsinissaq soqutigineqartariaqarsoraa. Kinguartitsisoqarneranilu piffissaq utaqqinermut atorneqartoq eqqarsarluarnermut atorneqarsimanissaa isumalluarfigaa:
- Tamatta qularutiginngilarput silap allanngoriartornera ilungersunartorsiorfiummat, kisianni aamma pingaaruteqarpoq, eqqortumik aalajangertoqarnissaa. Tassami, imminut napatissinnaassuseq aatsaat pisinnaavoq inuussutissarsiuteqarnikkut, inooriaatsikkut aammalu silaannaap allanngoriartupiloorneranut appasinnerpaaffiliiniarnerup tungaasigut oqimaaqatigiimmik pilersitsisoqarpat, taanna oqarpoq.
Nunarpulli pimoorullugu silap allanngoriartorneranut appasinnerpaaffiliiniarnermut ilanngutissaguni suliassarpassuaqassaaq. Arlaannaannulluunniillu isumaqatigiissummut toqqaagaluaraanniluunniit iliuuseqartoqartariaqassaaq, Sulisitsisuni pisortaq Christian Keldsen oqarpoq:
- Kalaallit Nunaat ullumikkut taamaallaat 16 procentiinnarmik minguitsumik nukissiuteqarnikkut pilersuisarpoq – sinneralu 84 procenti mingutsitsisuuvoq. Tassa imaappoq atsiortoqaraluarpat atsiortoqanngikkaluarpalluunniit apeqqutaanngilaq, taannami pappiaraannaavoq. Pingaarneruvorli iliuuseqartoqarnissaa. Taannalu uanga piumaneruara aallartigasuaqqullugulu ajornanngippat piaartumik.