Silaannakkut angallannermut oqartussaaffik suleqatigiissitap nalilersuiffigissagaa
Naalakkersuisulli suleqatigiissitamik pilersitsereerput. Angallannermummi naalakkersuisoq Erik Jensen akissuteqaammini allappoq Naalakkersuisut siunnersuutigineqartumi alloriarnerit aallarniutaasut suliarilereeraat.
Inatsisartut Naalakkersuisunut nunatta silaannartaata avalliup 19.500 fodinit portunerusumiittup aqunneqarnerata nunatsinnit tiguneqarnissaa pillugu danskit oqartussaasuisa oqaloqatigineqarnissaanik piumasaqarnerat tamatumunnga tunuliaqutaavoq.
Naalakkersuisoq: Pisariusorujussuuvoq
- Silaannakkut angallannermi oqartussaaffimmik tigusinissami unammilligassat annertupput, kisiannili Kalaallit Nunaata nunap iluani nunanullu tamalaanut silaannakkut angallannermi akisussaaffimmik annertunerusumik tigusinissaa isumalluarnartoqarpoq.
Angallannermut naalakkersuisoq Erik Jensen akissuteqaammi taama allappoq, silaannakkullu angallassineq suliassaqarfiusoq pisariusorujussuaq taavalu nunani tamalaani maleruagassianik annertuumik atuiffiusoq erseqqissaatigalugu.
Silaannartatta angallaffigineqarnera Islandimi Canadamilu silaannakkut angallannermik aqutsisoqarfinnit maanna nakkutigineqarpoq.
Suleqatigiissitaq, Mittarfeqarfimmik suleqateqartoq, Kommuninut, Nunaqarfinnut, Isorliunerusunut, Attaveqaqatigiinnermut Ineqarnermullu naalakkersuisoqarfiup ataani sulivoq.
Silaannakkut angallannermut suliassaqarfiup qanoq tiguneqarnissaanik nassuiaateqarnissaq qaqugulu tigusinnaaneranik pilersaarusiornissaq suleqatigiissitap suliassaraa.
Naalakkersuisoqarfiup danskit angallannermut, sanaartornermut ineqarnermullu ministereqarfiat matumani aamma suleqatigai.