Silaannartatta nakkutigineqarnera suliffissaqartitsissaaq
Nunatta Atlandtikullu avannaata silaannartaata ilaa, islandimiut canadamiullu oqartussaasuinit nakkutigineqarpoq. Tamannalu Nunatta annertunerusumik aningaasarsiutiginagu.
Nunattali silaannartaata allaffissornikkut nakkutigineqalernerani tamanna Nunatsinni suliffissanik pilersitsisinnaasoq, Inatsisartut sanaartornermut ataatsimiititaliaa isumaqarpoq siunnersuutigalugulu Nunatta silaanartaata nakkutigineqarnera maani Nuummi allaffissornikkut ingerlanneqarlertariaqartoq.
Naalakkersuisut piumaffigineqassapput
Atalantip avannaata Kalaallit Nunaatalu silaannartaasa angallavigineqarnerisa ilaata nakkutigineqarnera, Nunatsinni allaffissornikkut tamassuma aqunneqalernissaa siunertaralugu, ataatsimiititaliap siunnersuutigaa, Naalakkersuisut Inatsisartunit peqquneqassasut danskit naalakkersuisuinnut tamanna saaffiginnissutigineqassasoq.
- Kalaallit Nunaata taamatullu Altantikup avannaata nakkutigineqarnissaa, canadamiunit islandimiunillu nakkutigineqarnissaa, danskit naalagaaffiannit piumasarineqarsimavoq. Isumaqarpugullu Nunarput timmisartunit taama qulaavaaneqartigitillugu pissusissamisoortoq, immikkoortortaqarfimmik pilersitsinikkut Nunatsinniit tamanna nakkutigineqartariaqalersoq, isumaqarpungalu tamanna inuiaqatigiinnut pittaasumik kinguneqarumaartoq.
Aamma atuaruk Silaannakkut angallavissaq isumaqatigiinngissutaasoq
Suliffissaqartitsissaaq
Inatsisartut sanaartornermut ataatsimiititaliaata siulittaasua, Anders Olsen (S) taama oqarpoq aamma oqarluni, Nunatta silaannartaanik allaffissornikkut nakkutiginninneq Nunatsinnut nuunneqarpat, tamanna suliffissanik pilersitsisinnaasoq.
- Nakkutiginninneq tamarmiusoq Nunatsinnit tuguneqanngikkaluartoq, taamaattoq tamanna suliffisssanik ilikkakkanillu allanik pilersitsisinnaavoq, taamaalilluni tassuunatigut Nunatta tamanna iluaqutigisinnaallugu, Anders Olsen oqarpoq.
Silaannartatsinnik nakkutiginnissinnaasut tassaapput AFIS-itut ilinniarsimasut, tamannalu Naviair-imit aamma Mittarfeqarfinnit ullumikkut akisussaaffigineqarpoq.
Aamma atuaruk Doris J. Mogens Lykketoftimut naammagittaalliortoq
Danskit naalagaaffiata akisussaafigiuassavaa
Silaannartatta nakkutigineqarnera danskit naalagaaffianit ullumikkut akisussaaffigineqarpoq, tamannalu allanngortinneqassanngitsoq, Anders Olsen naqissusiivoq.
- Erseqqissaatigissallugu pingaaruteqrpoq, silaannartatta nakkutigineqarnera, danskit naalagaaffiata tigummimmagu aamma tamassuma Nunatsinnit akisussaaffigineqalernissaa siunertarineqanngimmat erseqqissaassutigissavara.
Inatsisartut sanaartornermut ataatsimiititaliaata siulittaasua, Anders Olsen (S) taama oqarpoq.
Nakkutiginninneq 20,6 millioner koruuninik akeqartarpoq
Kalaallit Nunaata Altantikullu avannaata silaannartaannik nakkutiginninnerit siorna 2014-imi, 20,6 millioner koruuninik akeqarsimasoq, Naviair A/S-ip KNR-imut oqaatigaa aamma oqarlutik nakkutiginninneq danskit naalagaaffiata aamma Naalagaaffiit Peqatigiit silaannarmik nakkutiginnittoqarfiata akilertaraat.