Doris J. Mogens Lykketoftimut naammagittaalliortoq

Nunat assigiinngitsut akornanneersut nunatta silaannartaatigoortarnerisigut suut aningaasartuutaasarpat isertitsissutaasarlutilluunniit? Kalaallit Nunaatalu nammineq silaannaap atorneqarneranik aqutsilernissaanut suut piumasaqaataappat?
Allattoq Karsten Sommer
apriilip 09-at 2015 09:22

Kalaallit Nunaat pillugu ataatsimiititaliap Siumumeersoq Doris Jakobsen sinnerlugu oktobarimi 2014-imi, tassa ukiup affaa sinnerlugu matuma siorna Angallannermut ministereqarfimmut apeqqutigisimavaa.

Angallannermut ministereqarfiup apeqquteqaat maannamut suli akissuteqarfigisimanngilaa, tamannalu tunngavigalugu Doris Jakobsen Folketingip siulittaasoqarfiata siulittaasuanut Mogens Lykketoftimut ullumi naammagittaalliuteqarpoq.

- Paasilluarsinnaavara, apeqquteqaatit akinissaannut piffissamik annerusumik pisariaqartitsisoqarsinnaassappat naalakkersuisoqarfiit ingerlatsiviillu akornanni paasissutissat piniarnerini. Kisianni eqqortuusinnaanngilluinnarpoq, apeqquteqaatima naasiunneraniit ukiup affaa sinnerlunga utaqqissasunga, Doris Jakobsen naammagittaalliummini allappoq.

Apeqquteqaatit tunngaveqarput kalaallit kissaatigimmassuk silaannartatta nunanit tamalaanit qulaassuaneqarneranut nakkutiginninneq namminneq tigorusussinnaammassuk.

- Akissuteqaateqartoqannginnerata kinguneqarsimavaa, suliap ingerlateqqissinnaannginnera, akissutissat pingaarutillit suli piffissami tassani utaqqigakkit, politikkimi suliannut akornutaasumik. Tamanna tunngavigalugu Siulittaasoqarfik qinnuigaara massakkut akuliuteqqullugu, qulakkeerniarlugu Grønlandsudvalgip akissutit pissarsiarissagai kiisalu taamatut pisoqaqqissanngitsoq, Doris Jakobsen Mogens Lykketoftimut allakkat naammagittaalliutini naggaserpai.

Suli pitsaanerulernissatsinnut ikiortigut! Nutaarsiassamut malugisaqaruit uunga allaffigitigut.

Aamma atuaruk