Silaannaap pissusaanut akisussaasup Danmark pakatsissutigaa

Danmarkip silap pissusaanut tunngasunut nukissiuutinullu ministeriata silap pissussaa pillugu iliuusissanut nunatsinni politikkikkut akisussaasumut, Jens B. Frederiksenimut taamatukanneq oqariartuuteqarpoq.

Jens B. Frederiksen naapertorlugu nunat taakkua marluk isumaqatigiissutiginikuugaluarpaat, assersuutigalugu uuliamut, gassimut aatsitassanullu tunngasunik nutaanik suliffissuaqalernikkut CO2-mik aniatitsinerulerneq Nunatta nammineq akilissanngikkaa.

- Qallunaat oqaatigivaat, Kuupiup Lykke Friisillu akornanni isumaqatigiissut atuuttutut maanna isiginngikkitsik, naalakkersuisunut ilaasortaq Jens B. Frederiksen oqarpoq. Qallunaallu isumaqatigiissummik paasinninnerat taassuma soorunami pakatsissutigaa.

- Soorunami pakatsissutigivarput, isumaqatigiissut ersarisoq atorunnaarsimmassuk. Taamaammat takulaassavarput, kingusinnerusukkut qanoq kinguneqassanersoq. Kisianni soorunami oqaatigivarput, uagut atuuttutut isigigipput, Jens B. Frederiksen oqarpoq.

Nunatta Danmarkillu isumaqatigiissutaani paasinninnerup taama assigiinngitsiginera, Jens B. Frederiksenip paasiuminaatsippaa, oqarluni imminnut erseqqilluinnartuusoq. Oqarporli, oqaatsit isumatigiissummi qanoq atorneqarnerat apeqqutaasoq.

Jens B. Frederiksenili paaseqatigiissuteqarnissamut isumalluarpoq. 

- Aamma isumatigiippugut, januaarimi taanna pillugu naapissalluta. Tassani siunissami suleriaasissaq ersarilluinnartumik aaqqissorneqassaaq. Siunissami isumaqatigiissutit atsiugassat ersarittuussapput, paatsoorneqarsinananatik. Tamakkua isumaqatigiissutigivagut. Suleqatigeqqinnissaa qilanaarivara, aamma isumaqarpunga angusaqarluarsinaassalluta, Jens B. Frederiksen oqarpoq.

Tassalu neriuppoq, angusaqarfiunerusumik oqaloqatigeeqqilersinnaassallutik.
Tassami CO2-p aniasup millisarniarnera pillugu  isumaqatigiinniarnerni 1990 aallaavigineqartarpoq. Nunarput taamani annerusunik suliffissuaqanngilaq, nunatsinnilu atugarissaarnikkut ineriartorluassagutta suliffissuaqarnikkut aamma ineriartornissamut periarfissaqartariaqartugut.

Jens B. Frederiksenip saqqummiussinnermini, Nunarput Danmarkimit paasineqartoq nalilerpaa.