Silaannaap allanngoriartornera pillugu mianersoqqussuteqarput

FN-imi silaannaap pissusaanik ilisimasallit – silaannaap allanngoriartornera pillugu ullumikkut aatsaat taamak sakkortutigisumik mianersoqqussuteqarput. Silaannaap pissusaanik ilisimasallit sermip immallu sikuata aakkiartuinnarnerisigut imaq 18-59 centimeterinik qaffakkumaartoq siulittuutigaat.

Maanna saqqummiunneqarpoq Bangladesh tassaasoq nunarsuarmi kiatsikkaluttuinnarnerup kinguneranik maannangaaq malussarfiulereersoq.

Qeqertaq St. Martin Bangladeshimiittoq ukiut tamaasa milliallattarpoq. St. Martin Bangladeshimi kisiartaalluni koraalinit qeqertannguuttuuvoq, taamaattorli koraalerpassuit amerliartuinnartut malinnit aserorneqartalerput.

- Inuit maaniittut ukiut 50-it imaluunniit 100-t qaangiuppata qanoq pisoqarsinnaaneranik oqaluttuunneqanngisaannarput. Kisianni qeqertap ukiut 20-t matuma siornagut 12 kvadratkilometerinik annertussuseqaraluartup maanna 8 kvadratkilometeriinnanngornera nammineerlunga takuara. Tupigusuutigaarput kangerliumaneq aalisarfigisartagarput inuussuteqarfigisarpullu taama allanngortigimmat. Qanittukkut uumasut immamiittut ilaatigut saaniluit aarluarsuillu sineriatsinni toqorarput, St. Martin-imi borgmesteri Moulvi Feroze Ahmed oqarpoq.

Bangladesh 140 millioninik inoqarpoq nunarsuarmilu nunap angissusaa eqqarsaatigalugu inuttunerpaanut ilaalluni. Ritzauimit allaaserinittoqarpoq ukiuni 50-100-ni imaq ukiumut meterimik ataatsimik qaffattarpat Bangladeship 11 procentia morsukkumaartoq.