Indonesiami ulussaarsuartoqarnerani ajunaartut 631-nngortut

Indonesiami ulussaarsuartoqarnerata kingunerisaanik qarsutsinersuarmi nunallu sisoornerani ajunaartut 631-nngorput.

Indonesiami ajunaarnersuaqartillugu iliuuseqarnermut ataatsimiititaliaq marlunngornermi taama nalunaarpoq.

Annaassiniartartut ikiuiniaqatigiillu qarsutsinersuarmit eqqugaasunut ikiorsiiniarneq ilungersuutigaat. Inuit 472-it ujaarineqarput.

Inuit milionilikkaat qimagussorneqartut nalunaarutigineqarpoq. Inuit 283 millionit nunami tassani najugaqarput.

Inuit ajunaartut ikinnerpaamik 502-usut Indonesiami oqartussaasut ataasinngornermi nalunaarutigaat. Taamaalilluni ajunaartut 100-nik amerleriarput.

Indonesiami, Malaysiami, Thailandimi Sri Lankamilu inuit ajunaartut amerlassusaat naatsorsorneqaqqinneranni, ajunaartut katillugit 1.200-ngajaapput.

Ulussaarsuit pingasut Asiap kujataanut kangiatalu kujataanut ataatsikkut anngunnikut qarsutsinersuarnut pissutaapput.

Sri Lankami ajunaarnersuaqartillugu ikiuiniartartut nalunaarutaat kingulliit naapertorlugit, inuit ikinnerpaamik 390-it qarsutsinersuarmi ajunaarput, Thailandip kujataani inuit ikinnerpaamik 176-it ajunaarsimasut, oqartussaasut nalunaarutigaat. Malaysiami inuit marluk ajunaarput.

Sialuk monsuni ajorseriartoq

Ulussaarsuit sialummut monsunimut ukiut tamaasa pisartumut ajorseriaannartitsipput. Tamatuma kingunerisaanik nunami tamatumani ukiuni kingullerni qarsutsineqartarnera aatsaat taama ajortigaaq.

Silarsuarmi Peqqissaanikkut Suliniaqatigiiffik, WHO, ataasinngornermi nalunaarpoq annaassiniartartunik pisariaqartinneqartunillu sumiiffimmut aallartitsipallallutik.

Indonesiap præsidentia Prabowo Subanto qeqertap Sumatrap avannaanut, eqqugaanerpaasut ilaannut, ataasinngornermi tikippoq.

- Ajornerpaaq qaangiutereerpoq - neriuppunga, taanna oqarpoq.

Immap qaffakkiartornera annikilliartulersimasoq, AFP-p marlunngornermi allaaseraa.

Qarsutsinerup kingunerisaanik aseruinerit pissutigalugit inuit hornorujutuusindilikkuutaat utaqqiisaasumik sumiiffissarsiortariaqarput imermillu minguitsumik nerisassanillu pissarsiniarlutik ilungersortariaqarlutik.

/ritzau/