VIDEO SIK: Suliffissaaleqisut ikiorsiissutaasimasunik utertitsiniartarnertik erloqissutigisarpaat
Pisortanit ikiorsiissutit tamatigut utertinneqartussaaneq-ajoraluartut, utertitsinissamik pisussaaffillit sivisuumik taarsersuiniarnerminni erloqisariaqartarput. Ikiorsiissutinillu utertitsisariaqartartut allat tassaapput meeqqat atuarfiini asaasartut ukiullu ingerlanerani atuarfiup matoqqanerata nalaani suliffeerukkallariaqartartut.
- Ajornartorsiutigilersimavarput assersuutigalugu suliffeqanngikkallarsimasoq atuarfik matummat, tassa qaammatit marluk affarlu, ikiorsiissutinik piniarsimagaluarpoq itigarsimallunili, SIK-mi siulittaasoq Jess G. Berthelsen oqarpoq.
Ikiorsiissutinik piniarnerup itigartitsissutigineqarnera isumaginninnermi naammagittaalliuuteqartarfimmut maalaarutigineqaraluarpoq, naqissuserneqarlunili meeqqat atuarfiini asaasartut piffissap ilaannaani suliffissaaleqisuusartut.
Aamma atuaruk Sulisartut nalinginnaasut atugaat sammineqarlik
- Ajornerpaavoq ilaatigut inunnik isumaginninnermi naammagittaalliortarfimminngaanniit oqariartuutigineqarmat, nalunngereeramiunngooq atuarfeqarfik qaammatini marluk pingasullu akornanni matoqqassasoq taava isumagisimasinnaagaluarpaa taakkua aningaasarsiat ukiumut naallugit atornissaanut sipaassallugit. Atuarfeqarfimmi sulereersut ilaatigut 4-tiimiinnaq sulisinneqartarput, Jess G. Berthelsen oqarpoq.
Kommuneqarfik Sermersooq paasissutissiivoq ikiorsiisoqassatillugu ikiorsiisarfimmi pissutsit assigiinngitsut aallaavigalugit nalilersueqqaartoqartartoq. Piffissalli ilaannaani suliffissaaleqisartut ikiorsiissutaasimasunik utertitsiniartarnertik erloqissutigisarpaat.
- Ilaasortagut taamatut aqqusaagaqarsimasut sivisuumik erloqisarput qaqiniapiloorlutik. Nalinginnaasumik kingumut ukiup affaatigut akiligassat akilersuutigalugit taarsersugassat taarsersorniartarlugit, Jess G. Berthelsen oqarpoq.