SIK: Sulisartut nalinginnaasut atugaat sammineqarlik
Taakkumi politikkikkut oqallinnermi sammineqanngippallaarsorai. Naak aamma partiit qineqqusaarnermi matumani sulinerup akilersinnaasariaqarneranik uteqattaarigaluartut, SIK-p siulittaasua Jess G. Berthelsen oqaaseqaateqarluni taama allappoq.
Pisortanit ikiorsiissutigineqartartunut naleqqiullugu sulinerup akilersinnaanerusariaqarneranik politikkikkut oqariartuutigineqartut ilaat innersuussutigai.
- Qineqqusaartut ilarpassuisa pissusiviusunik ilisimasaqannginnerat malunnarpoq. Piviusormi tassaammat pisortanit ikiorsiissutinik pisartagaqartut ilarpassuisa ikiorsiissutit taarsigassanngorlugit pisarmatigik, Jess G. Berthelsen erseqqissaavoq.
Taamaliortoqartarneratalu kinguneranik suliffissaaleqisut kiisami suliffissarsigaangamik, taava ikiorsiissutitut pissarsiarisarsimasatik utertillugit akilersuilersarput - peqatigisaanillu qaammammoortumik aalajangersimasumik aningaasartuutitik akilersortussaallugit.
- Ilaasortavut minnerpaaffittut akissarsiaqartinneqartut taarsigassaminnut aningaasartuutiminnullu aalajangersimasunut akiliinissaminnut periarfissaqanngillat. Taamaammat ilaasa sulilernissartik tunuarsimaarfigisinnaasarpaat, naak immaqa sulilerusukkaluarlutik. Suliffimmummi akuersigunik imminnut meeqqaminnullu pilersuisinnaajunnaassagamik.
- Taamaammat isumaginninnikkut ikiorsiissutinik taarsigassanngortitsisarneq atorunnaarsinneqartariaqarpoq. Aaqqissuussinermi innuttaasut pisortanut akiitsuinik asuli annerulersitsiinnarpoq, SIK-p siulittaasua oqarpoq.
