SIK Sisimiuni aalisartunut: Umiarsuarmik tunitsiviliinissaq isumatusaarnerunngilaq
Taassumami ernummatigaa siumut isigigaanni nunami suliffissat akileraarutillu ikinnerulernerannik kinguneqarnissaa.
- Una eqqaamaneqassaaq, taamatut umiarsualiinerit tamaasa nunami suliffiit eqqorneqartarput, akileraarutinut isertitassaraluit annaaneqartarput, SIK-mi siulittaasoq Jess G. Berthelsen oqarpoq.
Taassumalu erseqqissarpaa umiarsuarmut tunitsiviusumut tunisat nunatsinni suliarineqanngippata tamakkiisumik nunarput aningaasanik annaasaqassasoq.
Aamma atuaruk Sisimiuni aalisartut tunitsiviliisoqarnissaanik ilungersuuteqartut
Saniatigullu Jess G. Berthelsenip ernummatigaa, umiarsuit tunitsiviit Royal Greenlandip pigisaannut maanna nunami tunitsiviusunut unammillissammata, taamaalillutik isertitassaraluannik tigooraassallutik.
- Soorlu assersuutigalugu Royal Greenlandip tunitsiviutini saarullinnik amerlanerusunik tigooraalerniarluni annertusassappagit isertitaqartariaqarput. Allallu isertitassat tigoorarpassuk, qanoq ililluni ukiup tullianut Royal Greenland saarullinnik amerlanerusunik tigooraanissaminnut akissaqarniarlutik piareersassagamik? Taamaaliornerup kingunissaa eqqarsaatiginagu iliuuseqarneruvoq, Jess G. Berthelsen oqarpoq.
Taassuma eqqaasitsissutigaa, umiarsuarmik tunitsiviliinissaq naggataatigut suliffissaqanngitsunik amerlanernik pilersitsisinnaammat.