SIK: Pituffimmi sulisut nunaqavissut amerlineqarniarlik
Danskit suliffeqarfiata amerikamiunit pigineqartup, Exelis Services A/S-ip, Pituffimmi kiffartuussinissaq amerikamiut oqartussaannik aalajangiutivinneqareersorlu, SIK-p siulittaasua, Jess G. Berthelsen taama oqarpoq.
- Uagutsinnut apeqqutaavallaanngilaq suliffeqarfik sorleq kiffartuussisuussanersoq apeqqutaanerullunili nunaqavissut amerlanerpaat Pituffimmi sulisinneqarnissaat.
AAMMA ATUARUK Exelisip aalajangiiffigineqarnera Lidegaardip Præsidentip Illorsuani qaqinniarpaa
Amerikamiut oqartussaasa aalajangiutereeraallu suliffeqarfik Exelis Services A/S Pituffimmi kiffartuussisuussasoq, Nunatsinni sulisartut kattuffissuanni SIK-mi siulittaasoq, Jess G. Berthelsen, taama ersaritsigisumik KNR-imut oqarpoq.
Nunatsinni oqartussat piumasaqartariaqarput
Nunaqavissullu amerlanerit sulisorineqalissappata tamanna Nunatsinni Naalakkersuinikkut ingerlatsisunit piumasarineqartariaqartoq, Jess G. Berthelsen oqarpoq imalu nangilluni.
- Pituffimmi nunaqavissut sulisut ikippallaareerput, taamaattumik neriuutigiinnarsinnaavara kiffartuussisunit nutaanit nunaqavissut amerlanerusut salliutillugit sulisinneqalernissaat. Aamma isumaqarpunga tamanna Naalakkersuisunit piumasarineqartariaqartoq, Jess G. Berthelsen oqarpoq amerikamiullu nnatsinnik atuinerat pillugu ima oqarluni.
- Pissusissamisuuginnarpoq tamanna politikkertalissagaanni, tassami amerikamiut Nunatsinnik atuinerminnut akiliuteqarneq-ajorput, taamaattumik tamassumunnga taarsiullugu nunaqavissut sulisinneqartarnissaat minnerpaamik piumasarineqartariaqarpoq, Sulinermik Inuussutissarsiuteqartut Kattuffianni, SIK-mi siulittaasoq, Jess G. Berthelsen taama oqarpoq.
AAMMA ATUARUK Exelis Servicesip aalajangiineq naatsorsuutigisani naammagisimaarpaa
Exelis Services A/S: Piumasarineqartut malinniarpavut
Exelis Services A/S tusagassiorfinnut nalunaarumminni allapput, kalaallit danskillu sulinermut isumaqatigiissutaat malinneqassasut, kalaallinik ilinniartunik sulisoqartassasoq taamatullu Kalaallit Nunaannut Danmarkimullu akileraarutit naleqquttut akilerneqartassasut allallutik.
AAMMA ATUARUK Pituffik pillugu isumaqatigiissutip tunniunneqarnera amerikami naalakkersuisut akueraat
