PITUFFIK Pituffik pillugu isumaqatigiissutip tunniunneqarnera amerikami naalakkersuisut akueraat

Amerikami naalakkersuisoqarfiup allaffeqarfiata, Government Accountability Officep, GAO-p, kiffartuussinissamik isumaqatigiissutip Exelis Services A/S-imut tunniunneqarnera aalajangersarneqarpoq. Exilis Services nittartakkamini taama allappoq.

Amerikami naalakkersuisoqarfiup allaffeqarfiata, GAO-p ullumi februaarip 19-iani nalunaarutigaa, suliffeqarfiit Per Aarsleff A/S-ip, Copenhagen Arctic A/S-ip Greenland Contractors I/S-illu Pituffimmi kiffartuussinissamik isumaqatigiissutip tunniunneqarnerani aalajangiineq pillugu naammagittaalliutaat itigartillugu.

Exelis Services A/S-ip sakkutooqarfimmi ikaarsaarnermut suliassat maannakkut aallartisalerpai.

 

- Sulisunik oqaloqateqarnissarput isumaqatigiissutillu nutaap aallartisarnissaa qilanaaraarput, Exelis Services A/S-ip oqaaseqartartua Kim Ruberg taama oqarpoq.

AAMMA ATUARUK Professori: Pituffimmut suliaq tunngasoq ajugaanavianngilaq

- Suliffeqarfittut pingaartitalittut, kissaatigaarput inuit Danmarkimi Kalaallit Nunaannilu ilisimassagaat Exelis Services A/S ileqqorissaarluni aamma innarlerniagassaanani ingerlaniartoq inatsisit, isumaqatigiissutit aamma piumasaqaatit atortuusut naapertorlugit, ilutigalugu inuiaqatigiinni sulisitsisuulluni akisussaasoq.

 

- Exelis Services A/S-ip paasivai aamma sianigilluarpai Kalaallit Nunaanni Naalakkersuisut kalaallinik sulisoqarnissamik kissaateqarnerat. Suliffeqarfiup annerusumik suliaqartinniarpai maannakkut Pituffimmi sulisooreersut sulisoqarnermut inatsisit, malittarisassat aamma isumaqatigiissutit attuumassuteqartut tamaasa naapertorlugit aamma pisussaatitaanertik ataqqivaat sulisooreersut maannakkut atorfimminni atugaat allanngortinnagit Kalaallit Suliffeqarfimmik Tigusinissamut malittarisassaat naapertorlugit tigunissaat, Exelis Services A/S taama allappoq.

 

Kalaallit Nunaannut Danmarkimullu iluaqutissartaasut qulakkeerumavai

Exelis Services A/S-ip siunertaraa Kalaallinik Ilinniartoqarnermut Pilersaarummut peqataanissani aamma sulisussarsiorniarpoq sulisullu pikkorissut, piukkunnartut tigummiinnarniarpai aammalu suliffissanik nittarsaassinernik ingerlatsisarniarput kiisalu inuit naapillugit apeqqarissaarfigisarniarpai siunissami qanittumi.

Akerliusoqannginnerani aamma akerliusoqarnerani piffissaq tamakkerlugu, Exelis Services A/S arlaleriarlutik nalunaarutigisarpaat pisussaallutik Kalaallinut inuiaqatigiinnut aamma Danmarkimut iluaqutissat naleqquttut tamaasa isumannaarneqarnissaanik – ilagalugit akileraarutit attuumassuteqartut tamakkerlutik akilerneqartarnissaat – suliffeqarfimmit niuertorpalaartumik ingerlatsinermi salliutsillugit.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl